Капуцын з парку дзікай прыроды стаў новай зоркай кітайскіх сацсетак
Яго завуць Дачужан, што азначае «вялікі» або «моцны». Пры гэтым ён сарамлівы і пяшчотны капуцын.
Самец чорнагаловага капуцына жыве ў заапарку Хэжэй ужо 10 гадоў, але папулярнасць здабыў толькі пасля таго, як відэа з ім з’явілася на Douyin (кітайскі аналаг TikTok). Карыстальнікі празвалі яго «малпай з квадратным чалавечым тварам».
Хоць некаторыя карыстальнікі інтэрнэту называюць Дачужана «брыдка-мілым», спецыялістка па развядзенні капуцынаў Чжан Чуньсюэ распавяла China Daily, што сярод гэтых прыматаў квадратны твар і моцны целасклад лічацца стандартам прыгажосці.
Пры гэтым, паводле яе слоў, Дачужан — сарамлівы і пяшчотны капуцын.
«Ён залазіць на высокую жэрдку і хаваецца, калі да яго набліжаюцца незнаёмыя людзі», — патлумачыла Чжан Чуньсюэ.