На Мазырскім нафтаперапрацоўчым заводзе прайшлі затрыманні сярод кіраўніцтва
На Мазырскім нафтаперапрацоўчым заводзе прайшлі затрыманні. Як стала вядома выданню «Флагшток» ад крыніцы, звязанай з дзейнасцю прадпрыемства, затрыманні адбыліся ў канцы красавіка. Пад удар трапілі топавыя кіраўнікі завода.
Кіраўнікі на тэрыторыі МНПЗ. Ілюстрацыйнае фота: mnpz.by
Вядомыя пасады двух затрыманых з пяці. Гэта начальнік юрыдычнай службы і дырэктар дырэкцыі па рэканструкцыі і развіцці. Гэтых пасад няма ў спісе кантактаў на сайце завода. Па даных публікацый у заводскіх СМІ апошнімі гэтыя пасады займалі Драгель Ігар Валянцінавіч і Гуд Аляксандр Анатольевіч.
Таксама вядома, што была затрыманая жонка аднаго з кіраўнікоў.
Генеральны дырэктар МНПЗ Віталь Паўлаў. Фота: mnpz.by
Перад 1 мая генеральны дырэктар завода Віталь Паўлаў быў вельмі злы і зрываўся на падначаленых, адзначыла крыніца «Флагштока». Пры гэтым работнікі прадпрыемства мяркуюць, што прычынай затрымання стала карупцыя, а не «палітыка».