Сеул ацаніў страты Паўночнай Карэі ў вайне з Украінай
Паводле звестак паўднёвакарэйскай разведкі, Паўночная Карэя страціла каля 600 вайскоўцаў падчас баявых дзеянняў. Усяго з пачатку ўдзелу Пхеньяна ў вайне на баку Расіі былі паранены або забіты прыкладна 4700 салдат.
Парад у Пхеньяне, 25 красавіка 2022 года. Фота: Korean Central News Agency / Korea News Service via AP
Паводле звестак паўднёвакарэйскай разведкі, Паўночная Карэя страціла каля 600 вайскоўцаў падчас баявых дзеянняў ва Украіне, агульныя страты забітымі і параненымі ацэньваюцца ў 4700 салдат.
Паводле дадзеных разведкі, Паўночная Карэя накіравала 15 000 вайскоўцаў у Расію. Найбольш актыўныя баявыя дзеянні з удзелам карэйскіх салдат адбываліся ў Курскай вобласці, дзе расійскія войскі спрабавалі вярнуць тэрыторыі, занятыя ўкраінцамі.
Паводле паўднёвакарэйскай разведкі, за шэсць месяцаў баявога ўдзелу паўночнакарэйскія салдаты павысілі сваю баяздольнасць. Яны навучыліся выкарыстоўваць сучасную зброю, у тым ліку дроны, і атрымалі расійскую тэхнічную падтрымку ў сферы ваенных тэхналогій, уключаючы супрацьпаветраныя ракеты і спадарожнікі-шпіёны.
Паводле ацэнак Сеула, удзел Паўночнай Карэі ў вайне, уключаючы пастаўкі артылерыйскіх снарадаў і ракет, значна падмацаваў расійскія пазіцыі на заходнім фронце. Гэта таксама прывяло да паглыблення ваенна-палітычнага партнёрства паміж дзвюма дзяржавамі.