Вучыч пракаментаваў 100-тысячны пратэст у Бялградзе
Сотні тысяч людзей выйшлі на вуліцы Бялграда на буйны мітынг у суботу. Прэзідэнт краіны Аляксандр Вучыч заявіў, што ўлады павінны пачуць пасланне народа.
Дэманстранты перад парламентам Сербіі падчас буйнога мітынгу супраць карупцыі, які ўзначальваюць студэнты ўніверсітэта ў Бялградзе, Сербія, 15 сакавіка 2025 г. Фота: AP Photo / Marko Drobnjakovic
Аляксандр Вучыч заклікаў урад пачуць пасланне народа і патрабаванні пратэстоўцаў.
«Мы добра зразумелі пасланне, і ўсе чыноўнікі, якія знаходзяцца ва ўладзе, павінны зразумець яго, калі збіраецца столькі людзей. Нам давядзецца змяніцца самім і шмат чаму навучыцца», — сказаў Вучыч.
Ён таксама дадаў, што яму ясна, што сербы хочуць пераменаў, пераменаў мірных. Ён дадаў, што «грамадзяне Сербіі хочуць змяніць урад на выбарах».
Аляксандр Вучыч паведаміў, што падчас пратэсных акцый былі шпіталізаваныя 56 чалавек і амаль два дзясяткі чалавек былі арыштаваныя за падбухторванне да гвалту і вандалізму.
Сотні тысяч сербаў 15 сакавіка прынялі ўдзел у мітынгу, які стаў кульмінацыяй шматмесячных пратэстаў супраць прэзідэнта Сербіі Аляксандра Вучыча і яго ўрада.
Нягледзячы на дажджлівае надвор'е, вялізныя натоўпы дэманстрантаў апанавалі цэнтр Бялграда.
Пратэсты пачаліся чатыры месяцы таму пасля таго, як на чыгуначнай станцыі на поўначы Сербіі абрынуўся бетонны навес, у выніку чаго загінулі 15 чалавек. Мітынгі ў адказ на трагедыю ўспыхвалі амаль штодзень.