З’явілася петыцыя за падтрымку беларускай мовы на Amazon KDP
Падпісаць яе можна на платформе change.org, заўважыў reformby.org.
Электронная кніга Kindle. Фота: amazon.com
Kindle Direct Publishing — гэта платформа Amazon.com для публікацыі электронных кніг.
«KDL - платформа, якая робіць публікацыі даступнымі для ўсіх, за выключэннем аўтараў, якія пішуць на беларускай мове», — адзначаюць аўтары петыцыі.
Далучэнне беларускай мовы да гэтага сэрвісу можа дапамагчы выдаваць больш кніг на мове, якая знаходзіцца пад пагрозай знікнення.
Прыкладам аўтары петыцыі прыводзяць публікацыю кніг на ўкраінскай мове: за 2023 год такіх выйшла 10 тысяч на Amazon KDP, а ўнутры Украіны — 6 тысяч.
«Беларуская дыяспара і людзі ў Беларусі хочуць мець доступ да сучасных беларускіх кніг. Сотні беларускіх аўтараў, даследчыкаў і перакладчыкаў хочуць друкаваць свае кнігі праз KDP, але не могуць», — сказана ў тэксце.
У падтрымку петыцыі аўтары запусцілі хэштэг #BezosGiveMeMyBook.