Рабіна, які прапаў у ААЭ, знайшлі мёртвым
Улады Ізраіля заявілі, што рабін Цві Коган быў забіты. Яны назвалі гэта «подлым антысеміцкім актам тэрору» і паабяцалі прыцягнуць вінаватых да адказнасці.
Цві Коган
У Аб'яднаных Арабскіх Эміратах знойдзены мёртвым рабін Цві Коган, які з 21 лістапада лічыўся прапаўшым без вестак.
Улады Ізраіля заявілі, што Коган быў забіты. Яны назвалі гэта «подлым антысеміцкім актам тэрору» і паабяцалі выкарыстоўваць усе даступныя сродкі, каб прыцягнуць вінаватых да адказнасці.
Улады ААЭ пакуль не каментавалі заяву Ізраіля.
Грамадзянін Ізраіля і Малдовы Цві Коган служыў памочнікам галоўнага рабіна ААЭ і пасланнікам рэлігійнага руху Хабад.
Неназваныя прадстаўнікі спецслужбаў Ізраіля заявілі выданню Ynet, што кілеры збеглі ў Турцыю. Уладам Ізраіля, паводле паведамленняў, вядома, што за рабінам сачыла іранская выведка.