У Варшаве ў сярэдзіне верасня пройдзе Першы кангрэс беларускай культуры ў эміграцыі
На яго прыедзе каля 250 творцаў.
Ужо вядома, што на варшаўскі кангрэс прыедзе пісьменнік Альгерд Бахарэвіч, сярод заяўленых экспертаў — мастак Андрэй Дурэйка і дырэктарка Берлінскай галерэі сучаснага мастацтва Prater Galerie Лена Прэнц, піша «Будзьма».
Удзел у падзеі возьмуць старшыня Беларускага ПЭНа Таццяна Нядбай і выдавец Андрэй Янушкевіч.
Чакаецца, што ў кангрэсе будзе ўдзельнічаць агулам каля 250 творцаў і экспертаў, зацікаўленых у развіцці культуры Беларусі.
Арганізатары ІнБелКульт 2.0 падкрэсліваюць: «Кангрэс — вынік сумесных намаганняў беларускіх экспертаў і арганізацый і з’яўляецца важным крокам да паляпшэння ўзаемадзеяння, стварэння эфектыўнай мадэлі супрацоўніцтва як унутры беларускай культурнай супольнасцi, так і на міжнароднай арэне».
Сваё прадстаўніцтва ў падзеі заявілі таксама эксперты культурных арганізацый еўрапейскага асяроддзя: дырэктар Старамейскага дома культуры Марцін Ясінскі, дырэктар Тэатральнага інстытута імя З. Рашэўскага Эльжбета Вратноўска, дырэктар Інтытута Пілецкага ў Берлiне Ханна Радзіёўская і многія іншыя.
Арганізатары ставяць перад сабой наступныя задачы:
- даследаваць актуальную сітуацыю;
- стварыць умовы для развіцця беларускай культуры і захавання культурнай спадчыны;
- распрацаваць стратэгію рэалізацыі мастацкіх праектаў;
- падняць статус культурных прафесіяналаў;
- пабудаваць масты, якія злучаюць беларускіх мастакоў і культурныя арганізацыі памiж сабой i з еўрапейскімі калегамі.
Уваход на Кангрэс беларускай культуры ў эміграцыі вольны, але па абавязковай папярэдняй рэгістрацыі.
Дата: 16 і 17 верасня.
Месца правядзення: Цэнтр крэатыўнасці на вуліцы Таргова, 56, Варшава.