Беларусам тэлефануюць з расійскіх нумароў з сацыялагічнымі апытаннямі. Чым цікавяцца?
Чытачы паведамілі «Нашай Ніве» пра хвалю сацыялагічных апытанняў з расійскіх нумароў. У беларусаў, якія ўнутры краіны, цікавяцца стаўленнем да ваенных дзеянняў ва Украіне і магчымага ўзброенага паўстання ў Беларусі.
Такія тэлефанаванні былі некалькі тыдняў таму.
«Назваліся нейкім расійскім сацыялагічным цэнтрам. Сказалі, што праводзяць даследаванне сярод беларусаў на прадмет іх стаўлення да актуальных палітычных падзей у рэгіёне. Сувязь была дрэнная, і на фоне было чуваць вельмі шмат тэлефонных размоў — мяркую, што на гэтую тэму», — дзеліцца жыхарка аднаго з абласных цэнтраў.
Беларуска вырашыла адказаць на пытанні, каб у ініцыятараў апытання было больш негатыўных водгукаў і «каб не думалі, што ў Беларусі ёсць падтрымка дзеянняў Расіі».
«Мяркую, на аснове гэтых даследаванняў яны будуць вызначаць сваю палітыку ў дачыненні да нашай краіны».
Жанчына запомніла і пазначыла пытанні, якія ёй задавалі. Спачатку стандартна запыталі пра ўзрост і рэгіён пражывання, а пасля пайшлі закрытыя пытанні з магчымымі адказамі «так» ці «не» або з прапанаванымі варыянтамі адказаў. Прыводзім іх:
- Ці падтрымліваеце вы дзеянні Расіі ў гэтым канфлікце?
- Хто вінаваты ў сітуацыі, якая склалася: Расія / Украіна / Польшча / НАТА?
- Як вы мяркуеце, ці пагражае Літва тэрытарыяльнай цэласнасці Рэспублікі Беларусь?
- Ці пагражае Польшча тэрытарыяльнай цэласнасці Беларусі?
- Ці пагражае Расія тэрытарыяльна цэласнасці Беларусі?
- Ці давяраеце вы медыя Расіі?
- Ці давяраеце вы медыя Украіны?
- Ці давяраеце вы дзяржаўным медыя Беларусі?
- Ці давяраеце вы незалежным медыя Беларусі?
- У выпадку ўзброенага паўстання беларускага дэмакратычнага руху ці гатовыя вы далучыцца да яго?
- Як вы лічыце, у выпадку раптоўнай смерці прэзідэнта Беларусі, што стане з краінай? (Палепшыцца ці пагоршыцца сітуацыя)
- Ці прыйдуць у такім выпадку дэмакратычныя перамены?
У канцы ў беларускі спыталі, на якой мове яна размаўляе дома і да якой нацыянальнасці належыць.
Тое, што праводзіцца апытанне, пацвердзілі нам яшчэ некалькі жыхароў Беларусі. Частка пытанняў супадае з тымі, пра якія расказвалася вышэй. Але ж некаторыя гучаць іначай:
- У складзе якога саюза вы б хацелі знаходзіцца? (У ЕС, з Расіяй, ні з кім, стаць суб'ектам РФ)
- Ці патрэбная мытня Беларусі з РФ? (Так, не)
- Як вы ставіцеся да працоўнай дзейнасці (працы) беларусаў у РФ? (Добра, дрэнна, хутчэй добра, хутчэй дрэнна і да т. п.).
- У склад якога вайсковага саюза вы б хацелі ўваходзіць? (НАТА, АДКБ, іншыя варыянты).
Што за расійская арганізацыя праводзіць апытанне, нашы чытачы адказаць не змаглі. Адны не памятаюць, а іншыя кажуць, што на тым баку проваду дакладна не назваліся.
«Сказалі, што тэлефануюць з Масквы і робяць сацыялагічнае апытанне беларусаў», — згадаў адзін з чытачоў.
Наколькі вядома «Нашай Ніве», беларускія незалежныя ініцыятывы, якія таксама рэгулярна праводзяць сацыялагічныя апытанні, да гэтага апытання дачынення не маюць. Магчыма, грамадскую думку вывучалі расійскія дзяржаўныя сацыялагічныя агенцтвы, напрыклад ВЦІОМ.