Лукашысты выцягнулі з нафталіну старую прапанову Лукашэнкі адносна Бабарыкі
На допіс у твітары прадстаўніка ЗША ў АБСЕ Майка Карпентэра, датычны шпіталізацыі Віктара Бабарыкі са слядамі збіцця з наваполацкай калоніі ў мясцовую бальніцу нечакана адрэагавала Беларуская амбасада ў Эстоніі.
«Мы ўважліва сочым за паведамленнямі аб раптоўнай шпіталізацыі беларускага палітвязня Віктара Бабарыкі. Рэжым у Беларусі нясе поўную адказнасць за здароўе Віктара Бабарыкі і больш за 1 490 іншых палітвязняў. Мы заклікаем да іх неадкладнага вызвалення», — заявіў прадстаўнік ЗША ў АБСЕ Майк Карпентэр.
«Вядома, значна прасцей «уважліва сачыць», чым пасылаць спецыялістаў з ЗША ў Беларусь для азнаямлення з матэрыяламі крымінальнай справы Бабарыкі, як гэта прапаноўваў зрабіць прэзідэнт А. Лукашэнка ў 2020 годзе», — пракаментавала гэта паведамленне беларуская амбасада ў Эстоніі.
Азнаёміць экспертаў з Інтэрпола, ЗША, Польшчы і Расіі са справай «Белгазпрамбанка» Лукашэнка распарадзіўся амаль тры гады таму, 16 ліпеня 2020 года, неўзабаве пасля затрымання свайго меркаванага галоўнага канкурэнта на маючых адбыцца прэзідэнцкіх выбарах.
Чытайце таксама:
«Дагэтуль у бальніцы, стан сярэдняй цяжкасці». Што вядома на гэты момант пра стан Віктара Бабарыкі
«Увесь чорны». Што апошняе было вядома пра Віктара Бабарыку ў наваполацкай калоніі