Палітвязень Акіхіра Гаеўскі-Ханада пасля суда сустрэўся з маці і сястрой
Пра гэта ён напісаў у вестачцы на волю, паведамляе «Вясна».
«Пасля прысуду далі пакуль толькі адно спатканне з мамай і сястрой. Яе за гэтыя гады бачу ўпершыню — падрасла. Хоць адчуванне, што бачыліся вось толькі ўчора. Час ляціць хутка на самай справе. Так што трэба бадзёра сустракаць кожны дзень і выкарыстоўваць яго з карысцю. Будзем старацца», — піша палітвязень.
6 верасня Акіхіра Гаеўскага-Ханаду асудзілі разам з дзевяццю іншымі абвінавачанымі па справе «Рэвалюцыйнага дзеяння» і вынеслі яму жорсткі прысуд — 16 гадоў калоніі.
Падтрымайце палітвязня лістамі салідарнасці: СІЗА-1, 220030, г. Мінск, вул. Валадарскага, 2, Акіхіра Святаслававіч Гаеўскі-Ханада