Дзяржсакратар ЗША назваў Лукашэнку «апошнім дыктатарам Еўропы»
Выступаючы ў панядзелак на ўручэнні штогадовых узнагарод Дзярждэпартамента за грамадзянскую мужнасць жанчынам з розных краін свету, Энтані Блінкен заявіў, што Вашынгтон працягне дамагацца вызвалення палітвязняў у Беларусі, паведамляе ТАСС.
Кіраўнік замежнапалітычнага ведамства ЗША адкрыў цырымонію, якая праходзіла ў фармаце тэлемоста, з ушанавання Марыі Калеснікавай.
«Напярэдадні прэзідэнцкіх выбараў яна мабілізавала жанчын па ўсёй краіне, каб пратэставаць супраць кіравання Аляксандра Лукашэнкі — апошняга дыктатара Еўропы», — заявіў Блінкен.
Ён дадаў, што Калеснікава знаходзіцца пад вартай.
«Злучаныя Штаты працягваюць заклікаць да яе неадкладнага вызвалення, а таксама да вызвалення ўсіх палітычных зняволеных у Беларусі», — падкрэсліў шэф амерыканскай дыпламатыі.
Пры гэтым першая лэдзі ЗША Джыл Байдэн, якая таксама выступіла на цырымоніі, сказала: «Справядлівыя выбары ў Беларусі ўмацуюць таксама нашу ўласную (амерыканскую) дэмакратыю».