Сяргей Ваганаў. Дакуль?
Журналіст, публіцыст, паэт Сяргей Ваганаў адгукнуўся вершам на затрыманні музыкаў у цэнтры Мінска на Дзень Волі.
На рагу Камсамольскай і Рэвалюцыйнай
Сабраліся пра Волю спяваць музыкі.
Спяваць пра Волю немагчыма без болю.
А болю, шаноўныя, няма без рызыкі
Апынуцца за кратамі з затычкай у горле.
З тонкімі пальцамі, кайданкамі сцятымі.
З душой, ад рыку неабароненай,
З Айчынай у сэрцы з яе горкімі святамі…
Дакуль яшчэ ім іграць сваю ролю —
Забаронцам Айчыны з іх лютасцю традыцыйнай?!
Спяваць пра Волю немагчыма без болю
На рагу Камсамольскай і Рэвалюцыйнай.