Рабаўніку банка ў Магілёве далі 15 гадоў ўзмоцненага рэжыму
У Магілёве вынеслі прысуд расіяніну Паўлу Цімафееву, які роўна год таму абрабаваў аддзяленні Беларусбанка. Яго прызналі вінаватым у разбоі з мэтай завалодання маёмасцю ў асабліва буйным памеры і захопе групы закладнікаў з карыслівых меркаванняў і прысудзілі да 15 гадоў пазбаўлення волі ў калоніі ўзмоцненага рэжыму з канфіскацыяй маёмасці.
Ён павінен будзе кампенсаваць пацярпелым закладнікам маральную шкоду — па 5 тыс. рублёў кожнай з семярых жанчын.
Пісталет рабаўніка, які аказаўся не баявым, знішчаць.
Суд над Паўлам Цімафеевым афіцыйна распачаўся 14 чэрвеня, але фактычна - 27 верасня. Абвінавачанага не даставілі на першае паседжанне па стане здароўя - з-за ўскладнення пасля міліцэйскай кулі. Суд тады прыняў рашэнне адкласці слуханне да выздараўлення абвінавачанага.