Важак расійскіх штурмавікоў у Славянску: Мы акружаны
«Дзве калоны бранятэхнікі Узброеных сілаў Украіны рухаюцца да цэнтра Славянска, — паведаміў у эфіры тэлеканала «Расія 24» важак расійскіх штурмавікоў у горадзе Вячаслаў Панамароў. —
Адна калона знаходзіцца за 6 кіламетраў ад горада, другая — за тры-чатыры кіламетры.
Украінскія вайскоўцы ўжо занялі адзін з блокпастоў пасля кароткага бою.
«Мы ўзятыя, як той казаў, у кола блакады. Будзем аказваць супраціў», — сказаў Панамароў.
У Славянску знаходзяцца таксама байцы расійскіх спецпадраздзяленняў. У горадзе шмат расійскіх журналістаў. У той жа час украінскіх ці заходніх рэпарцёраў там паарыштоўвалі і трымаюць у закладніках.
Паводле словаў Панамарова, у яго людзей «досыць сілаў для аказання супраціву». «Зброі трошкі малавата», — наракае ён.
Жыхароў папярэдзілі, каб яны не выходзілі з хат.
У рэгіёне ўведзены рэжым антытэрарыстычнай аперацыі.
Расія ўчора запатрабавала ад Украіны вывесці войскі з Данбаса. МЗС Украіны адкінула такі ультыматум.
Учора ўкраінскія вайскоўцы вызвалілі стратэгічна важны Святагорск. Уначы ўкраінцы адбілі штурм танкавай часці ў Арцёмаўску. Таксама ўначы ўкраінская Нацыянальная гвардыя выкінула сепартыстаў з будынку гарсавета Марыупаля.
За апошнія тыдні ў сутычках з расійскімі штурмавікамі і ад іх рук у Данецкай вобласці загінулі прынамсі 12 чалавек.