Інваліды перамаглі ў судзе мінскі аэрапорт
Сёння ў судзе Кастрычніцкага раёна Мінска будзе заключанае міравое пагадненне паміж старшынёй Рэспубліканскай асацыяцыі інвалідаў-вазочнікаў Яўгенам Шаўко і гендырэктарам Нацыянальнага аэрапорта «Мінск» Дзмітрыем Мелікянам.
Яўген Шаўко падаў пазоў у суд пасля вандроўкі на самалёце вясной 2013 года. У аэрапорце яго вазілі на непрыстасаваным для хворага чалавека крэсле. Тады Яўген скардзіўся супрацоўнікам на непрыдатнасць крэсла. Аднак новай каталкі ў «паветраных варотах» Беларусі так і не з'явілася.
У выніку суд стаў на бок Шаўко, які пагадзіўся на заключэнне міравога пагаднення. У выніку аэрапорт забяспечыць пасажыраў-інвалідаў неабходнымі вазкамі, а таксама выплаціць пазоўніку 10 мільёнаў рублёў за маральныя страты.
«Наша міравое пагадненне адпавядае таму, што я патрабаваў», — радуецца рашэнню Яўген Шаўко.