Žychary Śvietłahorska — suprać budaŭnictva zavoda bielenaj celułozy

Žychary Śvietłahorska i vioski Jakimava Słabada vystupajuć suprać budaŭnictva na bazie Śvietłahorskaha celułozna-kardonnaha kambinata zavoda bielenaj celułozy.

23 studzienia pytańnie mahčymaha budaŭnictva było abmierkavany na schodzie ŭ Śvietłahorskim haradskim centry kultury. Prysutničali pradstaŭniki rajonnaj ułady, Śvietłahorskaha CKK, Minpryrody, rajonnaha centra hihijeny i epidemijałohii, Biełaruskaha navukova-daśledčaha centra «Ekałohija».

«Było kala piacisot čałaviek. Z zały nie było nivodnaj stanoŭčaj repliki. Ludzi ŭ bolšaści svajoj kateharyčna suprać budaŭnictva, bo heta budzie škodnaja vytvorčaść, a ŭ našym horadzie i biez novaha zavoda ekałahičnaja situacyja vielmi drennaja», — paviedamiŭ člen Sojma Partyi BNF Vadzim Bołbas, jaki raniej pracavaŭ u łabaratoryi ekałahičnaha kantrolu pry Śvietłahorskaj inśpiekcyi pryrodnych resursaŭ.

Pierad schodam zajaŭlałasia, što budzie zasłuchana Spravazdača ab acency ŭździejańnia na navakolnaje asiarodździe płanavanaj haspadarčaj dziejnaści pa budaŭnictvie zavoda pa vytvorčaści sulfatnaj bielenaj celułozy na bazie AAT «Śvietłahorski CKK». Ale, pavodle słoŭ Bołbasa, było abnarodavana tolki reziumie nie techničnaha charaktaru — «pra toje, jaki ŭpłyŭ na ekałohiju akaža budaŭnictva zavoda, a nie sama vytvorčaść bielenaj celułozy».

U reziumie havorycca, što, «zychodziačy z pradstaŭlenych prajektnych rašeńniaŭ, pry pravilnaj ekspłuatacyi i absłuhoŭvańni abstalavańnia, pry realizacyi praduhledžanych pryrodaachoŭnych mierapryjemstvaŭ, pry strohim vytvorčym ekałahičnym kantroli niehatyŭnaje ŭździejańnie płanavanaj dziejnaści na navakolnaje asiarodździe budzie niaznačnym».

Pavodle słoŭ Bołbasa,

hałoŭny inžynier celułozna-kardonnaha kambinata pierakonvaŭ ludziej, što vytvorčaść nie budzie škodnaj i jon byŭ na padobnym zavodzie ŭ Kitai.

Na schodzie jak chimik i ekołah jon raskazaŭ ab prablemach, jakija ŭźnikajuć na zavodach pa vytvorčaści celułozy.

Hramadski aktyvist Telman Maślukoŭ prapanavaŭ vynieści na hałasavańnie pytańnie «Ličyć niemetazhodnym budaŭnictva na bazie CKK zavoda bielenaj celułozy». «Ale rajonnyja ŭłady, jakija pravodzili schod, usio adciahvali heta pytańnie, vyrašali — hałasavać, nie hałasavać, u vyniku praciahnuli čas, i ludzi razyšlisia», — skazaŭ Maślukoŭ.

Pavodle jaho słoŭ, na schodzie było prapanavana stvaryć hramadskuju kamisiju, jakaja b adsočvała situacyju z budaŭnictvam zavoda. «My prapanavali ŭklučyć u kamisiju troch pradstaŭnikoŭ rajvykankama, centra hihijeny i epidemijałohii i CKK, a taksama siem pradstaŭnikoŭ hramadskaści. Svaje prapanovy my nakirujem u vykankam i prapanujem stvaryć takuju kamisiju», — paviedamiŭ aktyvist.

Zavod pa vytvorčaści sulfatnaj bielenaj celułozy mahutnaściu 400 tysiač ton u hod płanujecca pabudavać na bazie Śvietłahorskaha celułozna-kardonnaha kambinata. Miarkujecca, što prajektavać i budavać zavod buduć kitajskija śpiecyjalisty za kitajski kredyt u 654,16 młn. dołaraŭ.

• 0
• 0
• 0
• 0
• 0
• 0
• 0
• 0