Udzielniki niefarmalnaha samita SND, jaki prachodzić u Jałcie 10—11 lipienia, pryniali sumiesnuju zajavu adnosna kirunkaŭ dalejšaha supracoŭnictva.
Udzielniki niefarmalnaha samita SND, jaki prachodzić u Jałcie 10—11 lipienia z nahody 60‑hodździa prezidenta Ukrainy Viktara Janukoviča, pryniali sumiesnuju zajavu adnosna kirunkaŭ dalejšaha supracoŭnictva.
U dakumiencie, apublikavanym na sajcie ŭkrainskaha kiraŭnika, adznačajecca, što prezidenty Azierbajdžana, Armienii, Biełarusi, Kazachstana, Rasii i Ukrainy, a taksama staršynia Vykankama — vykanaŭčy sakratar SND, pazityŭna aceńvajuć vyniki niefarmalnaj sustrečy, padčas jakoj «byli abmierkavanyja pytańni ekanamičnaha i inviestycyjnaha supracoŭnictva ŭ ramkach SND, a taksama pierśpiektyvy realizacyi sumiesnych prajektaŭ raźvićcia transpartnaj i turystyčnaj infrastruktury, u tym liku na rehijanalnym uzroŭni».
«Zajaŭlajem, što zabieśpiačeńnie rostu ŭzroŭniu žyćcia hramadzian i palapšeńnie ich dabrabytu źjaŭlajucca važniejšymi zadačami SND u sučasnych umovach, a taksama ličym aktyvizacyju ekanamičnaha ŭzajemadziejańnia pryjarytetam dziejnaści Sadružnaści», — havorycca ŭ dakumiencie.
«Asablivaja ŭvaha» na sustrečy była nadadzienaja pytańniu libieralizacyi handlu pamiž krainami SND. Dasiahnuta damoŭlenaść «pradoŭžyć aktyŭnuju pracu nad novym Dahavoram ab zonie svabodnaha handlu i razhledzieć hetu temu na čarhovym pasiadžeńni Savieta kiraŭnikoŭ dziaržaŭ SND».
«Uličvajučy najaŭny pazityŭny vopyt, u metach zabieśpiačeńnia ŭstojlivaha raźvićcia ŭsich krain Sadružnaści, zajaŭlajem pra nieabchodnaść dalejšaha raźvićcia ŭ ramkach SND prahram sacyjalna‑ekanamičnaha supracoŭnictva na doŭhaterminovuju pierśpiektyvu», — adznačajecca ŭ dakumiencie.
Baki paćvierdzili namier «aktyŭna ŭdzielničać u realizacyi važnych infrastrukturnych prajektaŭ» i ŭ tym kantekście ličać karysnym praviedzieny «kanstruktyŭny abmien mierkavańniami adnosna raźvićcia mižnarodnych transpartnych kalidoraŭ, a taksama mahčymaha ŭzajemavyhadnaha ŭdziełu ŭ prajektach zacikaŭlenych dziaržaŭ Sadružnaści».
Prezidenty adznačyli metazhodnaść «sumiesnaj realizacyi inviestycyjnych prajektaŭ raźvićcia, skiravanych na pašyreńnie sietki kurortna‑azdaraŭlenčych, lačebnych i inšych abjektaŭ krain Sadružnaści».
U miežach vykanańnia rašeńnia kiraŭnikoŭ dziaržaŭ ad 8 maja 2010 hoda ab abviaščeńni 2012 hoda Hodam sportu i zdarovaha ładu žyćcia ŭ SND, a taksama ŭličvajučy padrychtoŭku da praviadzieńnia va Ukrainie ŭ 2012 hodzie čempijanatu Jeŭropy pa futbole i ŭ Rasii ŭ 2014 hodzie zimovych Alimpijskich hulniaŭ, adznačana «metazhodnaść sumiesnaha ŭdziełu zacikaŭlenych bakoŭ u budaŭnictvie i madernizacyi stadyjonaŭ, spartyŭnych zbudavańniaŭ i nieabchodnaj infrastruktury».
«Vitajem taksama praviadzieńnie čempijanatu śvietu pa chakiei ŭ Minsku ŭ 2014 hodzie», — havorycca ŭ dakumiencie.
Kiraŭniki dziaržaŭ zajavili pra padtrymku inicyjatyvy praviadzieńnia ŭ Kijevie ŭ krasaviku 2011 hoda mižnarodnaj kanfierencyi «Dvaccać piać hadoŭ čarnobylskaj katastrofy. Biaśpieka budučyni», pryśviečanaj pieraadoleńniu nastupstvaŭ avaryi na Čarnobylskaj AES, uklučajučy pytańni pieraŭtvareńnia abjekta «Schovišča» ŭ ekałahična biaśpiečnuju sistemu.
9 lipienia Viktaru Janukoviču spoŭniłasia 60 hadoŭ. Učora jon śviatkavaŭ jubilej u Livadyjskim pałacy z kalehami z krain SND. Siońnia dla ŭdzielnikaŭ mierapryjemstva buduć praviedzienyja demanstracyjnyja paloty novych ukrainskich samalotaŭ u Simfieropali.
Kamientary