U Sudanie paŭstancy pahadzilisia na humanitarnaje pieramirje pa prapanovie ZŠA i arabskich krain. Urad suprać

Niadaŭna SCHR zachapili horad El-Fašyr — apošni bujny nasieleny punkt u zachodnim rehijonie Darfur, jaki jašče trymaŭ pad kantrolem sudanski ŭrad. Abłohu horada paŭstancy trymali kala paŭtara hoda. Uvieś hety čas humanitarnaja dapamoha tudy nie pastupała, i pa danych AAN, u horadzie pačaŭsia hoład.

Paśla ŭziaćcia El-Fašyra źjavilisia paviedamleńni pra masavyja zabojstvy mirnych žycharoŭ i razbureńni. Arhanizacyja Abjadnanych Nacyj i pravaabaroncy śćviardžajuć, što situacyja ŭ horadzie krytyčnaja. Sami ž SCHR admaŭlajuć, što ździajśniali złačynstvy, ale pryznajuć, što «peŭnyja bajcy parušali dyscyplinu» i, pavodle ich słoŭ, častku ź ich užo aryštavali.

Paśla hetych padziej SCHR zajavili, što pahadžajucca na humanitarnaje pieramirje, prapanavanaje ZŠA, Saudaŭskaj Aravijaj, Abjadnanymi Arabskimi Emiratami i Jehiptam. Hetaje pieramirje pavinna praciahvacca try miesiacy i dać mahčymaść dastavić dapamohu ludziam, jakija apynulisia ŭ zonach bajavych dziejańniaŭ.

U zajavie SCHR havorycca, što meta pieramirja — «pieraadoleć katastrafičnyja humanitarnyja nastupstvy vajny» i stvaryć umovy dla pieramoŭ ab miry. Paŭstancy taksama zajavili pra hatoŭnaść da palityčnaha dyjałohu, jaki b vyrašyŭ «hłybokija pryčyny kanfliktu» i pryvioŭ da «spraviadlivaha i tryvałaha miru».

Adnak urad Sudana nie padtrymaŭ prapanovu. Ministr abarony krainy Chasan Kabrun zajaviŭ u telezvarocie, što kraina budzie praciahvać padrychtoŭku da vajny, bo heta «zakonnaje prava sudanskaha naroda». Jon padziakavaŭ administracyi prezidenta ZŠA Donalda Trampa za sprobu ŭrehulavać situacyju, ale dadaŭ, što biez poŭnaha razzbrajeńnia SCHR nijakich pieramoŭ nie budzie.

Pradstaŭnik sudanskaha ŭrada ŭ kienijskim Najrobi Machamied Asman Akaša taksama adznačyŭ, što ŭrad hatovy spynić bajavyja dziejańni tolki ŭ tym vypadku, kali SCHR buduć raspuščanyja, a ich lidaraŭ pryciahnuć da adkaznaści za złačynstvy suprać nasielnictva.

Tym časam mižnarodnyja arhanizacyi bjuć tryvohu: Sudan pieražyvaje najbolšy humanitarny kryzis u śviecie. Pavodle AAN, bolš za 24 miljony čałaviek (amal pałova nasielnictva) ciarpiać ad niedachopu ježy, vady i miedycynskaj dapamohi.

U mnohich rehijonach krainy dziejničajuć palavyja kuchni i vałanciorskija arhanizacyi, jakija kormiać miascovych žycharoŭ, ale zapasaŭ praduktaŭ chopić tolki na niekalki miesiacaŭ. Dabračynnaja arhanizacyja Islamic Relief paviedamlaje, što ŭ najbližejšyja paŭhoda bolšaja častka hetych kuchniaŭ moža spynić pracu z-za niedachopu charčavańnia i srodkaŭ.

Paśla zachopu El-Fašyra z horada ŭciakli bolš za 60 tysiač čałaviek. Mnohija ź ich ciapier žyvuć u łahierach dla biežancaŭ u rehijonie Taviła, dzie ŭmovy zastajucca vielmi ciažkimi — nie chapaje ježy, lekaŭ i pitnoj vady.

• 0
• 0
• 0
• 1
• 0
• 1
• 0
• 0