Bandy Haici ŭziali šturmam turmu i vyzvalili 4000 źniavolenych. Kraina pahruziłasia ŭ chaos

Uzbrojenyja bandy ŭziali šturmam turmu ŭ stalicy Karybskaj astraŭnoj dziaržavy Haici i vyzvalili amal 4000 źniavolenych, piša Bi-bi-si.

Šturm nacyjanalnaj turmy adbyŭsia ŭviečary ŭ subotu, praz dva dni paśla taho, jak haicianski premjer-ministr adpraviŭsia ŭ Kieniju damaŭlacca ab raźmiaščeńni na Haici mižnarodnaha kantynhientu dla baraćby z bandytyzmam, a adzin ź vierchavodaŭ bandytaŭ pa mianušcy Barbiekiu abviaściŭ premjeru vajnu.

U niadzielu, kali stała viadoma pra šturm turmy, tam pabyvali miascovyja karespandenty mižnarodnych ahienctvaŭ. Ahienctva AFP pieradaje, što brama turmy była adčynienaja, i kala ich lažali bolš za dziasiatak ciełaŭ. Ahienctva Reuters piša pra try cieły źniavolenych, jakija lažali ŭ dvary.

Ułady Haici abviaścili, što palicyja adnačasova sprabavała adbić ataki na hetuju turmu i jašče na adnu, Krua-de-Bukie. Kolki čałaviek źbiehła z druhoj turmy, nie paviedamlajecca, u pieršaj ža pa śpisie siadzieli kala 3800 čałaviek, i ŭ kamierach zastalisia, pa źviestkach Reuters, 99 ź ich. Pa słovach surazmoŭcy ahienctva ź liku supracoŭnikaŭ turmy, jany vyrašyli nie vychodzić, kab nie patrapić pad kuli.

Siarod hetych astatnich — byłyja kałumbijskija sałdaty, pasadžanyja pa abvinavačvańni ŭ saŭdziele ŭ zabojstvie prezidenta Haici Žavienela Maiza ŭ lipieni 2021 hoda.

Paśla hetaha zabojstva Haici, najbiadniejšuju krainu Amieryki, kančatkova nakryła chvala anarchii i bandytyzmu. Bandy kantralujuć 80% stalicy, Port-af-Prensa, letaś u 11-miljonnaj krainie byli zabityja amal 8,5 tysiač čałaviek.

U minułym hodzie Kienija vyrašyła ŭznačalić mižnarodny ŭzbrojeny kantynhient, jaki ŭcichamiryŭ by haicianskija bandy, i pasłać tudy tysiaču palicejskich. Jašče dźvie tysiačy sałdat paabiacała niadaŭna inšaja afrykanskaja kraina, Bienin, a finansavać hetuju apieracyju hatovyja ZŠA.

Viarchoŭny sud Kienii prypyniŭ rašeńnie vykanaŭčaj ułady adnosna Haici, i haicianski premjer Aryel Anry ŭ čaćvier adpraviŭsia ŭ Najrobi ratavać pahadnieńnie.

U hety ž dzień lidar adnoj z band, były palicejski Džymi Šeryźje pa mianušcy Barbiekiu abviaściŭ, što ŭsie bandy stalicy i pravincyi abjadnoŭvajucca, kab zrynuć Anry.

«Kraina nikim nie kirujecca, lidara niama, nasielnictva haładaje, ludzi bajacca vychodzić na vulicu. Narod stamiŭsia i nie moža bolš tryvać», — zajaviŭ Barbiekiu.

Z tych časoŭ i da šturmu turmaŭ adbyłosia niekalki pierastrełak, čaćviora palicejskich byli zabityja i piaciora paranienyja, bandyty napali na aeraport, z-za čaho byli admienienyja mnohija rejsy, niekalki studentaŭ byli nienadoŭha ŭziatyja ŭ zakładniki, i adzin ź ich paranieny.

• 6
• 0
• 2
• 17
• 22
• 11
• 9
• 0