«Znosiny z zamiežnikami jak asnoŭny dokaz viny».
U Kitai vynieśli abvinavačańnie ŭ špijanažy vysokapastaŭlenamu redaktaru adnaho z hałoŭnych ŚMI Kamunistyčnaj partyi Kitaja. Pra heta paviedamiła vydańnie The New York Times sa spasyłkaj na siamju zatrymanaha redaktara.
Donh Juju bolš za 30 hadoŭ pracavaŭ u adnoj z najbujniejšych kitajskich praŭładnych haziet Guangming Daily i byŭ tam vielmi aŭtarytetnym redaktaram, jaki pa abaviazku słužby i dla napisańnia artykułaŭ rehularna sustrakaŭsia jak sa zvyčajnymi zamiežnikami, tak i z palityčnymi dziejačami zamiežnych dziaržaŭ.
Padčas adnoj z takich sustreč u lutym minułaha hoda Donh Juju byŭ aryštavany kitajskimi śpiecsłužbami prosta na abiedzie z japonskim dypłamatam (jakoha, niahledziačy na niedatykalnaść, taksama zatrymali, ale potym praz paru hadzin adpuścili).
Svajaki redaktara tolki ciapier vyrašyli padzialicca hetaj historyjaj, bo darma spadziavalisia, što Donha Juju ŭ rešcie rešt vypuściać i zdymuć abvinavačańni.
«Pa słovach členaŭ jahonaj siamji, jakija pažadali zastacca ananimnymi z-za strachu pomsty, dahetul nie zrazumieła, ci staŭ 61-hadovy spadar Donh mišeńniu za jaho libieralnyja pohlady, kantakty z zamiežnikami, ci adrazu i toje, i inšaje. Adzinym dokazam viny, pradstaŭlenym na dadzieny momant, byli jaho kantakty z zamiežnymi dypłamatami i najaŭnaść zamiežnych akademičnych stypiendyj, jakija toj atrymaŭ raniej padčas pracy», — piša The New York Times sa spasyłkaj na siamju zatrymanaha redaktara.
Donh Juju źjaŭlajecca čałaviekam libieralnych pohladaŭ, jaki, niahledziačy na pracu ŭ adnoj z hałoŭnych praŭładnych haziet, pisaŭ krytyčnyja artykuły ŭ adnosinach da Kamunistyčnaj partyi Kitaja i nie zamoŭčvaŭ prablem palityčnaha, sacyjalnaha, ekanamičnaha i histaryčnaha napramkaŭ (pisaŭ jon artykuły i dla zamiežnych vydańniaŭ, takich jak The New York Times, The Times i inš.).
Naprykład, jon źviartaŭ uvahu na nieabchodnaść pryznańnia palityčnaj adkaznaści ŭsioj KPK za masavyja represii i ludskija achviary, jakija adbylisia ŭ Kitai padčas praŭleńnia Mao Czeduna. Taksama Donh Juju vystupaŭ za bolšuju padtrymku biednych kitajskich studentaŭ, pisaŭ ab prablemach zabrudžvańnia navakolnaha asiarodździa, a taksama publična prasoŭvaŭ idei viaršenstva zakona i niezaležnaj sudovaj sistemy.
Redaktaru na momant aryštu zastavałasia ŭsiaho try miesiacy da vychadu na piensiju, a ciapier jamu pahražaje ad 10 hadoŭ pazbaŭleńnia voli.
Kamientary