Bloomberg: Vypłaty za zahinułych va Ukrainie pryviali da skaračeńnia biednaści ŭ Rasii
Vajna, a dakładniej śmierci blizkich svajakoŭ i kampiensacyi, vypłačanyja dziaržavaj za ich hibiel, pieratvarylisia ŭ hałoŭny faktar rostu dachodaŭ samych biednych rasijan. Kampiensacyi za śmierć i adnarazovyja vypłaty ŭdzielnikam vajennych dziejańniaŭ dazvolili źnizić uzrovień biednaści ŭ Rasii, adznačaje ahienctva Bloomberg.
U jakaści prykładu vydańnie pryvodzić historyju Alaksieja Małava, jaki «maryŭ pra biełuju «ładu» i zmoh usio ž jaje sabie dazvolić, atrymaŭšy kampiensacyju za zahinułaha na vajnie syna. Vydatki rasijskaha biudžetu na ŭdzielnikaŭ vajennych dziejańniaŭ nadźmulisia nastolki mocna, što pryviali da rekordnaha deficytu biudžetu. Ahienctva adznačaje, što Uładzimir Pucin hatovy achviaravać rasijskaj ekanomikaj dziela vajennaha pośpiechu.
«Dziaržava nacelena na biednych i małamajomnych. Dla siaredniaha kłasa paviedamleńnie hučyć tak: «Da pabačeńnia, chłopcy, vy sami pa sabie», — zajaviła prafiesar, śpiecyjalist pa rehijonach Rasii Natalla Zubarevič.
Vydańnie padličyła, što sukupny rost sacyjalnych vydatkaŭ z boku dziaržavy dazvoliŭ rezka naraścić dachody 10% samych biednych słajoŭ nasielnictva. Pavodle acenak Bloomberg, rost dziaržvydatkaŭ na hetyja zadačy dazvoliŭ dachodam biednych rasijan abahnać inflacyju, jakaja ŭ 2022 hodzie skłała 11,9%, udvaja bolš. Vajennyja sacyjalnyja vypłaty ŭ kančatkovym vyniku pryviali da taho, što rasijan, jakija pražyvajuć za aficyjnaj rysaj biednaści, stała značna mienš. Pavodle źviestak Rasstata za treci kvartał 2022 hoda, u paraŭnańni z anałahičnym pieryjadam minułaha hoda, kolkaść biednych źniziłasia na 700 tysiač, a ŭ paraŭnańni z druhim kvartałam 2022 hoda — i zusim na 2,3 miljona čałaviek.
U 2023 hodzie źnižeńnia sacyjalnych vypłat z boku dziaržavy čakać nie varta. Kiraŭnik Minfina Anton Siłuanaŭ raniej zajaŭlaŭ, što jon chutčej pojdzie na skaračeńnie vydatkaŭ na infrastrukturu, čym na mierapryjemstvy pa źnižeńni kolkaści biednych u krainie. Adnak padobnaja rytoryka i jaje ŭvasableńnie ŭ žyćcio stvaraje surjoznuju ryzyku dla rasijskaha biudžetu, asabliva ŭ vypadku paśpiachovaj pracy naftavych sankcyj.
«Usplosk sacyjalnych i vajennych vydatkaŭ u spałučeńni ź niedachopam dachodaŭ ad nafty i hazu zrobiać biudžetny bałans Rasii ŭ hetym hodzie niezvyčajna dalikatnym. Sutyknuŭšysia z ryzykaj deficytu dachodaŭ, urad moža vybrać biudžetnuju kansalidacyju, dazvoliŭšy inflacyi častkova padarvać realny košt sacyjalnych dapamoh», — adznačaje ekanamist pa Rasii ŭ Bloomberg Economics.
Akramia vydatkaŭ na sacyjalnyja vajennyja vypłaty, u 2022 hodzie biudžet vydatkavaŭ bolš za 1 trłn rubloŭ na dapamohu siemjam ź dziećmi i kala 400 młrd — na piensii. Minfin śćviardžaje, što hetyja vydatki ŭ 2023 hodzie vyrastuć udvaja. Pavodle acenak ahienctva, vydatki na mabilizavanych i dobraachvotnikaŭ abychodziacca biudžetu prykładna ŭ 1,1 trłn rubloŭ u hod. Adnak navat taki rezki rost vydatkaŭ pakul nie stvaraje prablem dla rasijskaha biudžetu.
Ekanamist Jaŭhien Hantmachier adznačaje, što ŭ cełym ludzi stanoviacca biadniejšymi, adnak samyja biednyja stanoviacca trochi bahaciejšymi dziakujučy adnarazovym vypłatam i sacyjalnym dapamoham. Pa jaho słovach, prasłojka siaredniaha kłasa ŭ Rasii praz vajnu źniziłasia da rekordna nizkaj adznaki — ciapier jana nižejšaja za 10% nasielnictva. U jakaści paćviardžeńnia hetych źviestak jon nahadvaje, što sotni tysiač rasijan źjechali z krainy, čaściakom admoviŭšysia ad pracy i pakinuŭšy nieruchomaść u Rasii.
«Ludzi ŭ cełym biadniejuć, ale biednych stanovicca mienš», — padsumavaŭ jon.
Hety tezis paćviardžajecca danymi sacapytańniaŭ ab spažyvańni rasijan. Bolš za treć nasielnictva za 2022 hod stała bolš ekanomić na ježy, što idzie paralelna z danymi pa źnižeńni realnych dachodaŭ nasielnictva, jakija padali try kvartały zapar. Padobnyja ŭmovy čaściakom nie pakidajuć vybaru rasijanam, dla jakich udzieł u vajnie niaredka zastajecca apošnim sposabam pavialičyć ułasnyja dachody abo pahasić kredyty.
«Ludzi časta iduć na vajnu z-za biednaści. Heta sposab vyrvacca na svabodu», — tłumačyć Zubarevič.
Siemji zahinułych va Ukrainie rasijan atrymlivajuć ad 5 młn rubloŭ (70 tysiač dalaraŭ), paranienych — 3 młn rubloŭ (41 500 tysiač dalaraŭ). Davoli časta siemji mohuć pretendavać na dadatkovyja fiederalnyja i rehijanalnyja vypłaty, jakija tolki pavyšajuć zaležnaść rasijan ad dziaržavy i pryvučajuć ich da łajalnaści, kanstatuje ahienctva.
Kamientary
Tohda otdaj žizń muža, otca, syna, vnuka za durnuju vłasť na zachvatničieskoj vojnie.
Vsio v łučšich skriepach.