Hienprakuratura: Ekstremisckaj moža być pryznana nie tolki infarmacyjnaja pradukcyja, ale i simvolika
Zhodna z novym zakonam, buduć karać za ŭdzieł u ekstremisckaj arhanizacyi ŭ luboj formie.
Pra heta žurnalistam raspavioŭ hienieralny prakuror Andrej Švied. Siužet byŭ pakazany ŭ efiry «Biełaruś 1» viečaram u piatnicu, pišiet Tut.by.
Jon rastłumačyŭ, što ciapier Kryminalny kodeks praduhledžvaje adkaznaść tolki za arhanizacyju i kiraŭnictva ekstremisckim farmiravańniem.
— U vypadku pryniaćcia novaha zakona kryminalnaja adkaznaść budzie nastupać za lubuju inšuju formu ŭdziełu ŭ ekstremisckaj arhanizacyi, što vielmi važna. Heta i viarboŭka, heta i navučańnie, i prapahanda, i ŭsio, što źviazana z toj ci inšaj ekstremisckaj arhanizacyjaj.
Švied asabliva źviarnuŭ uvahu, što luboje sadziejničańnie arhanizacyi, «jakaja budzie pryznana ekstremisckaj», u tym liku i finansavaje, ciahnie za saboj u tym liku i kryminalnuju adkaznaść.
Spravy ab ekstremisckich arhanizacyjach buduć razhladać u sudach pa paskoranaj prahramie — maksimum za miesiac.
Švied zajaviŭ, što pry hetym kožny kankretny vypadak budzie razhladacca indyvidualna.
Nie budzie takoha, što sam fakt — čałaviek vyjšaŭ, štości tam skazaŭ, i heta ŭžo takaja adkaznaść abo takaja — nie. Budzie iści raźbiralnictva. Pry nieabchodnaści buduć pravodzicca ekśpiertyzy, pryciahvacca śpiecyjalisty, navukoŭcy, i ŭ sukupnaści budzie davacca acenka, što heta — administracyjnaje pravaparušeńnie, kryminalnaje złačynstva. Kali kryminalnaja — ci źviazana jano z ekstremizmam, u jakoj formie. Jakaja simvolika, atrybutyka vykarystoŭvałasia, elemienty hetaj simvoliki. I ŭ sukupnaści budzie davacca acenka.
U zakonie, pa jaho słovach, dadziena novaje vyznačeńnie ekstremisckim materyjałam — «heta budzie nie tolki infarmacyjnaja pradukcyja, ale i simvolika, i atrybutyka, pryznačanyja dla ažyćciaŭleńnia ekstremizmu i jaho prapahandy».
Pa słovach hienprakurora, kamientaram u internecie, «jakija «abražajuć, nanosiać škodu suvierenitetu, zaklikajuć da hvałtoŭnych dziejańniaŭ, staviać pad sumnieŭ asnoŭnyja asnovy hramadstva», taksama buduć davać pravavuju acenku ŭ tym liku pa artykułach, źviazanych z procidziejańniem ekstremizmu.
Kamientary