«Dumała, što branchit»: u Połackim rajonie ad karanavirusa pamierła zavuč pačatkovaj škoły
Natalli Dokanavaj 22 sakavika spoŭniłasia 60 hadoŭ. Jana pracavała namieśnicaj dyrektara ŭ škole-sadku vioski Homiel Połackaha rajona.
«U jaje kožny hod paśla dnia naradžeńnia pačynajecca branchit, — raskazvaje muž Hienadź. — Nu i tut dumała taksama, što prosta branchit. Palečycca — i projdzie. 20 krasavika pavieźli jaje ŭ Połack u palikliniku, tam adrazu pnieŭmaniju pastavili.
Jana, musić, tolki dzień palažała ŭ balnicy, a na nastupny stała zusim chranovieńka. Pakłali ŭ reanimacyju, 28 krasavika Mikałajeŭna maja pamierła. Nie vytrymali lohkija».
Pachavańnie adbyvałasia ŭ zakrytaj trunie. Tolki niekalki chvilin mašyna z trunoj pastajała la chaty, kab mahli raźvitacca rodnyja, susiedzi i adnaviaskoŭcy. Paśla adrazu zavieźli na mohiłki. Muž kaža, što z chraničnych chvarobaŭ u žonki byli tolki branchit i nyračnyja kamiani.
Mužčyna kaža, što test na karanavirus i ŭ jaje, i ŭ jaho byŭ stanoŭčy. «Kali daviedalisia pra jaje vynik, to adrazu da mianie pryjechali, testy rabili, apracoŭvali pamiaškańnie. Adpravili na samaizalacyju. Mianty kožny dzień zvanili to na damašni, to na mabilny. Sanstancyja zvaniła. Ja im kažu: «Nu kudy ja padzienusia, chiba što ŭ aharod vyjdu».
Spadar Hienadź kaža, što ŭ jaho dni čatyry była tempieratura da 38 hradusaŭ, ale ŭ cełym chvarobu jon pieranios lohka. «Ja žoncy kazaŭ, kab vypiła sa mnoj, a jana ŭsio «nie-nie»… Niešta tam u kampjutary pavyčytvajuć, a potym lečacca aby-čym, a treba lačycca, jak dziady kaliści».
Hienadź Dokanaŭ kaža, što ŭ vioscy šmat chto pachvareŭ, asabliva ludzi z škołki-sadka. «Našy dzieŭki ŭžo viartajucca pacichu ŭ škołu». Samomu Hienadziu 11 maja rabili apošni test na «karonu». «Viečaram u aŭtorak byŭ vynik — admoŭny. Užo dva dni chadžu na pracu».
Adkul karanavirus uziaŭsia ŭ nievialikaj połackaj vioscy? «Jość tut adna, na pracu z Navapołacka jeździć. Pryjechała i chvalicca: «U majho Vićki karanavirus». Heta chachal jaje, jon i ŭ Viciebsk jeździŭ, i jašče kudyści. Potym ad jaje ŭsie i pachvareli», — vykazvaje viersiju Hienadź Dokanaŭ.
Kamientary