Kuźniacoŭ: Ni Cichanoŭski, ni Capkała nie zdolnyja sabrać 100 tysiač podpisaŭ

Užo ciapier niaŭzbrojenym vokam vidać, što hałoŭnymi dziejnymi asobami budučaj prezidenckaj kampanii, akramia samoha Łukašenki, stanuć Cichanoŭski i Capkała.

Karcina — lubata. Jość dziejny kiraŭnik, jon — «usienarodna abrany» i takim i zastaniecca. Jość «vuličny hramiła» ŭ asobie Cichanoŭskaha, i jość pavažany kandydat, z vopytam i bekhraŭndam, typu z namienkłatury, dla ŭmieranaha, udumlivaha i bajaźlivaha abyvaciela, jaki budzie zapeŭnivać siabie, što, prahałasavaŭšy za Capkału, jon užo ździejśniŭ pratest suprać režymu.

Karcina nastolki pryhožaja, što ŭsie astatnija piersanažy ŭ joj bačacca prosta statystami.

Adnak jość adzin momant. Ni Cichanoŭski, ni Capkała, ni navat jany razam nie zdolnyja sabrać podpisy za svajo vyłučeńnie kandydatam u prezidenty.

Zbor podpisaŭ — heta piakielnaja praca, u jakoj spałučajecca i vielizarnaja fizičnaja nahruzka chadžeńnia pa kvaterach abo stajańnia ŭ pikietach i prosta kałasalny psichałahičny presinh vostrych stasunkaŭ na palityčnyja, bytavyja i žyćciovyja temy z zusim roznymi, časam i nieadekvatnymi ludźmi.

Kab sabrać 100 000 podpisaŭ, nieabchodna nie tolki razharnuć štaby va ŭsich abłasnych haradach (jak minimum), ale i mieć nie mienš za 3000 čałaviek, jakija buduć realna kožny dzień chadzić pa kvaterach pa ŭsioj krainie, a nie prosta ličycca ŭ śpisach. Heta značyć, 3000 bajcoŭ z žaleznym charaktaram, dubovym dacham i, nie pabajusia hetaha słova, śpiecyjalnaj padrychtoŭkaj.

Nabrać takuju kamandu za tydzień praź internet kateharyčna niemahčyma. Takija kamandy farmujucca hadami praz udzieł u samych roznych kampanijach. I takaja kamanda siońnia ŭ Biełarusi moža być sfarmiravana tolki z resursaŭ usich apazycyjnych demakratyčnych partyjaŭ. Tam, na ŭsich, stolki mienavita takich ludziej i nabiarecca.

Partyi i arhanizacyi tytulnaj apazicyi ŭdzielničajuć u elektaralnych kampanijach z razu ŭ raz pa pryncypie «na pracu», farmirujučy adpaviedny kaściak. Dapamahaje im u hetym i režym, zvalniajučy samych zaŭziatych, asudžajučy ich na status viečna biespracoŭnych — dla takich ludziej vybary stanoviacca realnym momantam padzarabić choć trochi hrošaj na tych samych podpisach, i jany hatovyja pracavać.

I voś cikavy raskład. Taja samaja tytulnaja apazicyja, jakaja tearetyčna jašče moža sabrać tyja samyja 100 000 podpisaŭ, jana siońnia faktyčna ŭ palitycy aŭtsajdar — nastolki jana skampramietavanaja, dematyvavanaja i nadakučyła.

Hałoŭnyja dziejnyja asoby, paŭtarusia, sabrać podpisy za siabie realna, pa-sapraŭdnamu, nie ŭ stanie. Pierakupić apazicyjny aktyŭ tak chutka taksama mała realna — heta vielizarny kavałak pracy, usich ich padniać i z kožnym pahavaryć.

Adčuvańnie, što scenarysty padrychtavali nam idealnuju imitacyju i šou, z vyraznymi rolami i akciorami na hetych rolach. U stahodździe cyfravizacyi i dydžytalizacyi dla taho, kab realizavać hetaje šou, akazalisia nie patrebnyja struktury, aktyvisty, vopyt i napracoŭki i da taho padobnaje. Spatrebiŭsia dobry pijar, abmierkavańnie ŭ fejsbuku, adpaviedny zapyt na novych asob.

Intryha asabista dla mianie zastajecca tolki adna: zarehistrujuć ci nie zarehistrujuć Cichanoŭskaha. Heta cikava, tamu što jaho nierehistracyja budzie aznačać, što jon budzie haniać pa Biełarusi i źbirać svaje sustrečy i mitynhi pa-za pravavym polem, a heta značyć, što KDB i AMAP buduć pracavać na rassłabonie, źniščajučy pratestny patencyjał hramadstva patrochu.

Jaho rehistracyja budzie aznačać, što na praciahu kampanii jon budzie nakručvać ludziej spakojna, i ŭładzie, z vysokaj dolaj vierahodnaści, pryjdziecca dušyć hetuju spravu ŭžo na płoščy adnym maštabnym udaram (što, pa-mojmu, dla ich źjaŭlajecca ryzykaj).

U situacyi ž, kali zahadzia viadoma ab niazdolnaści hałoŭnych dziejnych asob vykanać farmalnuju ŭmovu ŭ 100 tysiač podpisaŭ (ułasna, pačynajučy z 2006 hoda nichto jaje nie vykonvaŭ ni razu), mienavita rehistracyja abo nierehistracyja taho ci inšaha kandydata budzie aznačać, jaki mienavita scenar vybirajuć ułady.

• 0
• 0
• 0
• 0
• 0
• 0
• 0
• 0