Kruciejšyja, čym u bratoŭ Hrym: vychodzić zbornik biełaruskich čaradziejnych kazak
Na «Vulei» idzie kraŭdfandynhavaja kampanija dla vypusku niezvyčajnaha zbornika: «Viadźmar, jaki rabiŭsia vaŭkom» — heta tryccać biełaruskich kazak z kłasičnych zboraŭ etnohrafaŭ XIX—XX stahodździaŭ Paŭła Šejna, Jeŭdakima Ramanava, Michała Fiedaroŭskaha i Uładzisłava Viaryhi.
Dla hetaha vydańnia ich adabraŭ i apracavaŭ pa-novamu Anton Francišak Bryl. Niepaŭtornyja ilustracyi da knihi zrabiŭ znakamity mastak Valeryj Słavuk.
«Padbirajučy i rychtujučy kazki dla hetaj knihi, ja staviŭ pierad saboju razam try mety.
Pa-pieršaje, ja imknuŭsia pakazać čytačam styl i žyvy hołas biełaruskaj kazki. Zhładžvajučy niaroŭnyja ci ciažka zrazumiełyja miescy ŭ zapisach, ja staraŭsia nie pryvodzić ich usio ž da sterylnaj litaraturnaści, nie zahłušać całkam hołas raskazčyka — a samich raskazčykaŭ, dzie jany viadomyja, nazyvać pa imionach.
Pa-druhoje, ja chacieŭ padzialicca tym, što padabajecca ŭ biełaruskich kazkach mnie samomu. Čytajučy ŭpieršyniu kožnuju z hetych tryccaci, ja choć raz skazaŭ «Uch!» — ci z takoj, ci ź siakoj pryčyny. Moža, i vy skažacie.
Pa-treciaje — jak amatar kazak ŭsich narodaŭ śvietu — ja z asablivaju pryjemnaściu ŭklučaŭ u zbornik kazki, jakija dajuć admietnaje miascovaje pračytańnie jakoha-niebudź vielmi pašyranaha matyvu: pra čas, jaki biažyć na tym śviecie chutčej, čym na hetym; pra žytło niačyścikaŭ, jakoje papraŭdzie vyhladaje zusim nie tak, jak zdajecca vypadkovamu hościu; pra čaradziejnaha dapamožcu, pakryŭdžanaha biazdumnym učynkam», — dzielicca ŭkładalnik zbornika Anton Francišak Bryl.
U knižku ŭvojduć 30 kazak z 50 kalarovymi ilustracyjami, ahułam vyjdzie 80 staronak u ćviordaj vokładcy. Chočacie atrymać knihu — dałučajciesia da kampanii!
Pamiłavany i departavany ŭkrainiec Katovič raskazaŭ, za jakuju abrazu na jaho pakryŭdziŭsia Łukašenka2
Kamientary