U Aršanskim rajonie mužčyna vyrvaŭ i źniščyŭ kamieru chutkaści. Pra heta paviedamili va UUS Viciebskaha abłvykankama.
Incydent adbyŭsia 12 kastryčnika na vyjeździe z Oršy. «Mužčyna advoziŭ dziaŭčat u Viciebsk i za pieravyšeńnie chutkaści trapiŭ u abjektyŭ kamiery fotafiksacyi. Uviečary, viartajučysia nazad, na hetym ža miescy jon znoŭ pieravysiŭ chutkaść i byŭ «sfatahrafavany». Prykinuŭšy, što dva štrafy — heta šmat, 27-hadovy kiroŭca vyrašyŭ źniščyć prybor, kab paźbiehnuć pakarańnia», — raspaviali ŭ milicyi.
Mužčyna nakinuŭ na stacyjanarnuju kamieru piatlu i pry dapamozie aŭtamabila vyrvaŭ jaje. Paśla hetaha pajšoŭ jon damoŭ, dzie staŭ patrašyć prybor, sprabujučy znajści miesca, dzie zachoŭvajucca zdymki.
Pra toje, što fatahrafii nie zachoŭvajucca ŭ kamiery, a adrazu pieradajucca ŭ centr fiksacyi pravaparušeńniaŭ, ranicaj nastupnaha dnia kiroŭcu raspaviali supracoŭniki milicyi.
Pa fakcie kradziažu ŭ dačynieńni da žychara Oršy raspačali kryminalnuju spravu. Uron skłaŭ bolš za 24 tys. rubloŭ.
Kamientary