Sprava z kanfiskacyjaj na miažy ŭ Bieraści dziesiaci asobnikaŭ časopisu «ARCHE» raźvivajecca pa haradzienskim varyjancie. Tamtejšaje ŭpraŭleńnie dziaržbiaśpieki prosić sud pryznać ekstremisckim toŭsty numar vydańnia.
Sprava z kanfiskacyjaj na miažy ŭ Bieraści dziesiaci asobnikaŭ časopisu «ARCHE» raźvivajecca pa haradzienskim varyjancie.
Hałoŭny redaktar časopisu atrymaŭ list ź Dziaržaŭnaha mytnaha kamitetu za podpisam namieśnika jaho staršyni S.Barysiuka. U im paviedamlajecca, što ŭ adpaviednaści z zaklučeńniem Kamitetu dziaržaŭnaj biaśpieki ad 5.11.2008 u №7‑8 časopisu za 2008 hod «była pryznana najaŭnaść zaklikaŭ da ekstremisckaj dziejnaści i prapahandy takoj dziejnaści» (tut i dalej – pierakład z rasiejskaj).
Materyjały spravy pa hetym pytańni byli nakiravanyja ŭ sud Maskoŭskaha rajonu Bieraścia «z chadajnictvam ab pryznańni dadzienaj infarmacyjnaj pradukcyi ekstremisckaj i jaje nastupnym źniščeńni».
Jaki materyjał taŭščeznaha, 1100‑staronkavaha jubilejnaha numaru (časopisu spoŭniłasia 10 hadoŭ) nosić ekstremiscki charaktar? Redaktar «ARCHE» Valer Bułhakaŭ miarkuje, što eksperty bieraściejskaha KDB mahli kvalifikavać takim čynam analiz viadomaha biełaruskaha palitolaha V. Silickaha na temu parlamenckiŭ vybaraŭ, abo kruhły stoł, pryśviečany masavym zatrymańniam aktyvistaŭ apazycyi paśla vybuchu 3 lipienia ci recenziju kinakrytyka A. Rasinskaha na film A. Vajdy «Katyń», dzie aŭtar stavić čekistaŭ i fašystaŭ u adzin šerah. U numary nadrukavanyja dźvie histaryčnyja manahrafii ŭ pierakładzie z anhielskaj i polskaj movaŭ i try dziasiatki artykułaŭ, pieravažna navukovych i histaryčnych – vypusk maje za temu dasavieckuju historyju Biełarusi.
Analahičnyja sproby pryznać roznyja vydańni ekstremisckimi KHB rabiła na inšym «zachodnim rubiažy krainy», u Horadni. Tam taksama nakiroŭvali ŭ sud infarmacyjnyja materyjały, skanfiskavanyja pilnymi mytnikami ŭ rozny čas. Siarod ich akazalisia ŭlotki kandydata ŭ prezydenty Milinkieviča i roznyja hazety i knihi na biełaruskaj movie. U dziejačoŭ apazycyi, uniesienych u śpisy na pieratrusku, paprostu adbirali knihi, jakija jany brali na čytańnie z saboj u ciahnik.
Na ščaście, haradzienskija spravy pakul skončylisia ničym – sud zaviarnuŭ materyjały nazad, dačapiŭšysia da farmalnaściaŭ.Maŭlaŭ, načalnik abłasnoha ŭpraŭleńnia HB niapravilna aformiŭ pazoŭ.
Nie da śmiechu – majem spravu z metaskiravanym zapałochvańniem jak vydaŭcoŭ, tak i čytačoŭ, z sprobaj specsłužbaŭ viarnuć sabie cenzarskija funkcyi, miarkuje V. Bułhakaŭ. Takaja praktyka isnavała ŭ tatalitarnych dziaržavach – nacysckaj Hiermanii i Savieckim Sajuzie.
Časopis «ARCHE» – heta niezaležnaje navukova‑papularnaje i hramadzka‑palityčnaje vydańnie, u jakoje pišuć dziasiatki biełaruskich intelektuałaŭ. Dziakujučy svajoj vysokaj jakaści, jon staŭ adzinym biełaruskim vydańniem, zaprošanym u sietku eŭrapiejskich intelektualnych časopisaŭ «Eurozine».
Redaktar «ARCHE» nie vyklučaje, što jamu pryjdziecca źviarnucca da intelektuałaŭ i kulturnych vydańniaŭ inšych krainaŭ Eŭropy z zaklikam raspačać kampaniju salidarnaści.
Kamientary