Kudy zvadzić dzietak na navahodniaje śviata pa-biełarusku — top padziej u Minsku
Novy hod nie za harami, a, jak viadoma, bolš za ŭsio heta śviata lubiać dzieci. Afišami z prapanovami pravieści zimovyja kanikuły razam ź Dziedam Marozam i Śniahurkaj na śpiektaklach dy balach abviešany ŭvieś horad, ale biełaruskamoŭnych siarod ich niašmat. My pašukali i sabrali ich razam u adnym miescy.
Dla samych maleńkich
Biełaruska-niamieckija Kalady
Muziej Maksima Bahdanoviča prapanoŭvaje zabić dvuch zajcaŭ adrazu: paznajomicca z tradycyjami i biełaruskaha śviatkavańnia Kaladak, i niamieckaha. Akramia tradycyjnych chend-mejd majstar-kłasaŭ, padčas jakich vas navučać upryhožvać pierniki i kaladnyja cacki, abiacajuć batlejku i vystup ansambla narodnaj pieśni «Hamanina». Da imprezy treba padrychtavać Dziedu Marozu vierš i zhatavać što-niebudź sałodkaje — samym talenavitym i ščyrym haściam jon ščodra adździačyć.
- Kali: 15 śniežnia a 17.30
- Dzie: Muziej Maksima Bahdanoviča (vuł. Bahdanoviča, 13)
- Uzrost: 0+
- Košt: pa papiaredniaj rehistracyi
Kazka «Jak Kikimara Śniahurkaju była»
Ad 20 śniežnia pa 2 studzienia ŭ Teatry junaha hledača dzieciam budzie dazvolena toje, što zvyčajna nie dazvalajuć tut darosłym: tančyć, hučna kryčać i navat jeści. Usio heta ŭ miežach navahodniaj kazki «Jak Kikimara Śniahurkaju była». Akramia ahučanaj Kikimary, zabaŭlać dzietak buduć lasun Locha i Dzied Maroz.
- Kali: 20 śniežnia — 2 studzienia
- Dzie: Teatr junaha hledača, vuł. Enhielsa, 26
- Uzrost: 0+
- Košt: 5—8 rubloŭ
Kazka «Jak litara Ŭ uratavała Kalady»
Litara Ŭ — adna z hałoŭnych admietnaściaŭ, upryhožańnie biełaruskaj movy. Tamu nie dziva, što ŭ honar jaje nazyvajuć kaviarni, staviać joj pomniki i voś ciapier pryśviačajuć kazku, jakuju možna budzie pahladzieć 30 śniežnia i 4 studzienia. Kazka pra toje, jak adnojčy litara ŭratavała Kalady. Schadzicie daznajciesia, jak u jaje heta atrymałasia, i paśla dobra adździačcie za toje, što nie zhubili hetaje cudoŭnaje śviata prodkaŭ.
- Kali: 30 śniežnia i 4 studzienia
- Dzie: Moładzievy teatr estrady, Maskoŭskaja, 18a
- Uzrost: 0+
- Košt: 9.5 — 17 rubloŭ
Pakaz «Pryhody na Kaladki»
Pierad Novym hodam, viadoma, nas čakajuć nie mienš razuchabistyja Kaladki. Kali vašamu dziciaci pakul rana chadzić pa chatach u vobrazach kazy ci miadźviedzia, možacie pahladzieć, jak heta robiać inšyja. Studyja tradycyjnych biełaruskich śviataŭ «Łancužok» pakaža «Pryhody na Kaladki». Abiacajuć nie tolki raskazać, kudy i adkul iduć kaladoŭščyki, ale i pačastavać smačnymi piernikami i tradycyjnaj kućcioj.
- Kali: 25 śniežnia i 14 studzienia
- Dzie: kulturnaja prastora «Miod», Tałbuchina, 4
- Uzrost: 4+
- Košt: darosły — 5 rubloŭ, dziciačy — 12 rubloŭ
Dla školnikaŭ
Kvesty i majstar-kłasy «Da Kołasa na Novy hod»
Užo z 11 śniežnia muziej Jakuba Kołasa zaprašaje na śviatočnuju prahramu z majstar-kłasami pa vyrabie paštovak i kalendaroŭ, kvestami i lalečnymi pakazami. Vydatnaja mahčymaść prademanstravać dzieciam, što muziei — heta zusim nie sumna. Asabliva intryhuje anansavanaja hulnia-spabornictva na najlepšy karotkamietražny rolik «Jak by Jakub Kołas adznačaŭ Novy hod u XXI stahodździ». A sapraŭdy, jak?
- Kali: 11 śniežnia — 5 studzienia
- Dzie: Muziej Jakuba Kołasa, vuł. Akademičnaja, 5
- Uzrost: 6+
- Košt: 1—2 rubli
Ekskursii «Na Kalady ŭ muziej»
Svaje Kaladki buduć śviatkavacca i ŭ Raŭbičach u Muziei biełaruskaha narodnaha mastactva. Z kaladoŭščykami, nacyjanalnymi śpievami i tancami — usio jak maje być (chto nie ŭmieje tančyć, taho navučać). A jašče prademanstrujuć majsterstva sałomaplacieńnia, tamu damoŭ vy dakładna viernieciesia nie z pustymi rukami, a jak minimum z ułasnaj cackaj-aniołam.
- Kali: 23 śniežnia i 6 studzienia
- Dzie: Raŭbičy, Muziej biełaruskaha narodnaha mastactva
- Uzrost: indyvidualna
- Košt: 16 rubloŭ
Kancert «Zimovyja śviatki»
Biełaruski dziaržaŭny ansambl narodnaj muzyki «Śviata» viadomy kancertnymi numarami sa śpievami palešukoŭ. Cymbały, harmonik, baraban i roznyja staradaŭnija instrumienty ŭ spałučeńni z narodnymi śpievami i tancami — mocnaja enierhietyka. Praŭda, pierad tym, jak vieści na kanikułach u fiłarmoniju dzicia, vyznačcie dakładna, ci zdolnaje jano spakojna prasiadzieć jak minimum hadzinu.
- Kali: 30 śniežnia ŭ 19.00
- Dzie: Biełdziaržfiłarmonija, pr-t Niezaležnaści, 50
- Uzrost: 12+
- Košt: 12—17 rubloŭ
Darečy, asobnaj prahramaj u fiłarmonii abjaŭleny śniežny bał, jaki možna budzie naviedać u luby dzień z 24 śniežnia pa 7 studzienia (i navat na samy Novy hod).
Kali vy viedajecie jašče pra niejkija navahodnija padziei dla dzietak na biełaruskaj movie, asabliva ŭ inšych haradach Biełarusi, — pišycie ŭ kamientarach!
Ciapier čytajuć
Pamiatajecie čynoŭnika, jakoha kreatyŭna admazali ad zabojstva čałavieka na palavańni? Jon admazaŭsia znoŭ5
Kamientary