U minskich škołach zabaroniać zdavać najaŭnyja hrošy na charčavańnie — apłata tolki praz ARIP
Ad pačatku novaha navučalnaha hoda apłačvać charčavańnie ŭ minskich škołach stanie praściej. Baćkam bolš nie pryjdziecca pieradavać kłasnamu kiraŭniku najaŭnyja za śniadanki i abiedy, ciapier usie raźliki buduć prachodzić praź sistemu ARIP, piša Tut.by.
Kožnaje dzicia atrymaje numar rachunku, kudy baćki i buduć pieraličvać hrošy za charčavańnie. Płacić za śniadanki i abiedy mamy i taty zmohuć praz sms-bankinh, bankamat abo ŭ banku. Tak, jak raźličvajucca za padručniki abo hurtki.
— My jašče pradumvajem, albo baćki buduć płacić za miesiac napierad, albo za dva tydni, kab mienš było, abo pa fakcie, — tłumačyć Volha Jezapiankova, načalnik adździeła hramadskaha charčavańnia Hałoŭnaha ŭpraŭleńnia spažyvieckaha rynku Minharvykankama. - Chutčej za ŭsio — napierad, bo kambinatu školnaha charčavańnia treba zakuplać pradukty.
Da vieraśnia, kaža śpiecyjalist, miechanizm adpracujuć. Raniej pa bieznajaŭnaj sistemie raźliku charčavańnie apłačvali tolki ŭ navučalnych ustanovach, dzie dziejničała karta navučenca.
— Uvieś śviet užo pracuje pa takoj sistemie. Čamu b i nam na jaje nie pierajści, - praciahvaje Volha Jezapiankova. - Pry bieznajaŭnaj apłacie usio vyrazna i prazrysta. U toj ža čas tak zručniej i kłasnym kiraŭnikam, i zahadčykam vytvorčaściu: nie treba nikudy hetyja hrošy zdavać i inkasavać.
Kamientary