Samamu viadomamu kitajskamu dysidentu Lu Siaabo «zastałosia niadoŭha», pieradaŭ praz sacyjalnyja sietki adzin ź blizkich prafiesara.
U Lu rak piečani ŭ apošniaj stadyi, u brušnoj połaści źbirajecca vadkaść. Tym nie mienš, kitajskija ŭłady admovilisia vypuścić Lu na svabodu.
61-hadovy Lu Siaabo — łaŭreat Nobieleŭskaj premii miru 2010 hoda. Jon adziny ŭ historyi łaŭreat, jakomu ŭłady nie tolki nie dazvolili pryjechać na jaje ŭručeńnie, ale i nie dazvolili pieradać jaje praz svajakoŭ.
Lu siadzić u turmie z 2008 hoda, paśla taho jak napisaŭ «Chartyju-08» pa anałohii z češskaj «Chartyjaj-77». Jaho aryštavali za dva dni da publikacyi hetaha dakumienta i asudzili na 11 hadoŭ turmy za «dziejnaść, skiravanuju na padryŭ dziaržaŭnaj ułady». Na Nobieleŭskuju premiju jaho vyłučyli Vacłaŭ Havieł i Dałaj-łama.
Da taho jak stać lidaram hrupy intelektuałaŭ, što patrabavali svabody, Lu pracavaŭ prafiesaram Piekinskaha ŭniviersiteta. Ad 2003 hoda jon niekalki hadoŭ uznačalvaŭ Kitajski PEN-centr. U 1980-ja i 1990-ja jaho aryštoŭvali na adnosna karotkija terminy (paŭhoda, paŭtara hoda, try hady). U 2008-m jaho pasadzili nadoŭha.
Rak u Lu dyjahnastavali na vielmi poźniaj stadyi. Niekalki dziaržaŭ śvietu i šerah viadomych ludziej zaklikali Piekin dazvolić Lu vyjechać na lačeńnie za miažu, adnak ułady admovili. Prafiesara prosta pieraviali z turmy ŭ turemnuju balnicu.
U Kitai mnohija nie vierać, što rak u Lu ŭźnik i chutka raźviŭsia sam saboj. Ludzi taksama adznačajuć, što ŭ hrupy inšych źniavolenych apazicyjanieraŭ amal sinchronna pačalisia prablemy z kryvianym ciskam.
Lu Siaabo nazyvaŭ kitajskuju sistemu biesčałaviečnaj i vystupaŭ za pierachod Kitaja da demakratyi zachodniaha typu, za prava narodu vybirać uładu.
Infarmacyju pra stan zdaroŭja Lu pieradajuć u sacsietki blizkija, ale praź niebiaśpieku represij jany admaŭlajucca nazyvać siabie. U balnicy, dzie lažyć Lu, pra jahony stan «ničoha nie viedajuć».
Jahonuju žonku, paetku, mastačku i paplečnicu ŭ zmahańni, Lu Sia, taksama da muža nie dapuskajuć. 56-hadovaja Lu Sia ad 2010 hoda siadzić pad chatnim aryštam.
Pamiłavany i departavany ŭkrainiec Katovič raskazaŭ, za jakuju abrazu na jaho pakryŭdziŭsia Łukašenka2
Kamientary