«Chroniki Narnii» i zombi-chorar «1813» prezientujuć u Połacku

Połack naviedajuć adrazu piaciora sioletnich finalistaŭ premii «Debiut» imia Maksima Bahdanoviča — Siuzanna Paŭkšteła, Uładzimir Sadoŭski, Nadzieja Kim, Andrej Dzičenka i Michał Baranoŭski.

Sadoŭskaha žury «Debiutu» adznačyła za knihu «1813». Hetaja navieła — pieršy biełaruski zombi-chorar. Žanr, jaki daŭno raspaŭsiudžany za miažoj, pa-biełarusku nie raspracavany. Sadoŭski ŭziaŭ realnuju histaryčnuju asobu — Michała Kleafasa Ahinskaha, jakuju prymusiŭ zmahacca z napaleonaŭskimi žaŭnierami-zombi.

Kim pierakłała z anhlijskaj movy «Chroniki Narnii. Plamieńnik čaraŭnika» Kłajva Stejpłza Ljuisa. «Chroniki Narnii» — dziciačy fentezi-cykł, u jaki ŭvachodzić 7 knih. U ich raspaviadajecca pra pryhody dziaciej u Narnii — čaroŭnaj krainie, dzie jość mahija i idzie viečnaje zmahańnie dabra i zła. «Chroniki» — adna z najbolš paśpiachovych knižnych sieryj u historyi. Knihi pra Narniju pierakładzieny na 41 movu. Ciapier pieršuju knihu sieryi možna pračytać i pa-biełarusku.

Baranoŭskaha adznačyli za paetyčny zbornik «Volumen.1». Aryhinalnyja vieršy spałučany z aryhinalnym mastackim afarmleńniem. Kniha dla pryjemnaha čytańnia i razhladańnia.

Paŭkšteła zrabiła pierakład ź litoŭskaj movy knihi «Boh daždžu» Alvidasa Šlapikasa. «Boh daždžu» — heta kniha pra litoŭskuju pravincyju kanca 1990-ch.

Dzičenku ŭhanaravali za zbornik apaviadańniaŭ «Soniečny čałaviek». Andrej užo napisaŭ i vydaŭ niekalki knih pa-rusku. Jon piša ŭ žanry postkibierpank. «Soniečny čałaviek» staŭ dla jaho debiutam pa-biełarusku. Kniha — padarožža pa pamiežnych prastorach realnaści i śviadomaści. Hetaja knižka źmianiaje pohlad na ŭsiu kłasičnuju prozu pa-biełarusku.

Sustreča projdzie ŭ Muziei biełaruskaha knihadrukavańnia 3 červienia (Połack, vuł. Nižnie-Pakroŭskaja, 22). Pačatak a 15.00. Uvachod volny.

Pavialičyć

***

Premija «Debiut» imia Maksima Bahdanoviča — litaraturnaja premija, zasnavanaja ŭ śniežni 2010 hoda Sajuzam biełaruskim piśmieńnikaŭ, Biełaruskim PEN-centram i miecenatam Paŭłam Padkarytavym (Bierahovičam). Pieršaje ŭručeńnie premii adbyłosia na nastupny hod. Z 2014 hoda da arhanizataraŭ «Debiutu» dałučyŭsia dabračynny fond «Viartańnie». Premija ŭručajecca ŭ troch naminacyjach, u jakich pracavaŭ Maksim Bahdanovič, — «Proza», «Paezija», «Mastacki pierakład». Łaŭreatami stanavilisia Andruś Horvat, Anatol Ivaščanka, Hanna Jankuta, Taćciana Niadbaj, Viktar Marcinovič, Vital Ryžkoŭ, Natalla Charytaniuk i inšyja.

• 0
• 0
• 0
• 0
• 0
• 0
• 0
• 0