Piśmieńniki i biełarusy zamiežža pratestujuć suprać «Spravy 26-ci»

Zhurtavańnie biełarusaŭ śvietu «Baćkaŭščyna» i Sajuz biełaruskich piśmieńnikaŭ pratestujuć suprać palityčnaha pieraśledu hramadskich aktyvistaŭ.

Paśla pieryjadu ŭjaŭnaj libieralizacyi i pačatku doŭhačakanaha dyjałohu z demakratyčnymi krainami biełaruskaja ŭłada znoŭ pačała prymianiać hvałt u adnosinach da mirnych demanstrantaŭ, hramadskich aktyvistaŭ, dziejačaŭ kultury, praktykavać aryšty i źbićcio ŭdzielnikaŭ niehvałtoŭnaha supracivu.

Sistemny ekanamičny kryzis, u jakim siońnia znachodzicca Biełaruś, a taksama šerah niepapularnych zakanadaŭčych zachadaŭ z boku dziaržavy, samy sprečny ź jakich — Dekret №3 «Ab papiaredžańni sacyjalnaha ŭtrymanstva», sparadzili hramadskaje napružańnie, vynikam jakoha stalisia lutaŭskija i sakavickija masavyja mirnyja akcyi pa ŭsioj krainie.

Adkazam z boku dziaržavy na takuju reakcyju hramadstva, harantavanuju Kanstytucyjaj Respubliki Biełaruś, stali kala tysiačy zatrymanych, sotni asudžanych pavodle administratyŭnych artykułaŭ — u asnoŭnym aktyvisty niedziaržaŭnych hramadskich arhanizacyj i žurnalisty.

Niečuvanyja pa svaich maštabach i žorstkaści represii zajmieli praciah u fabrykavańni kryminalnaj spravy pa artykule «Arhanizacyja masavych biesparadkaŭ» (KK RB, art. 293, č.3) u dačynieńni da 26 hramadzianaŭ, siarod jakich apynulisia palityki, hramadskija aktyvisty, raspaŭsiudniki biełaruskaj knihi, a taksama šarahovyja hramadzianie. Usie jany byli zatrymanyja previentyŭna i nie mieli nijakaha dačynieńnia da arhanizacyi i praviadzieńnia ni papiarednich akcyj pratestu, ni śviatkavańnia Dnia Voli, što ładziłasia 25 sakavika.

Zatrymańni pa spravie 26-ci pravodzilisia hvałtoŭna i nahadvali vykradańni ludziej nieviadomymi asobami ŭ cyvilnym. Svajaki i advakaty niekalki sutak nie mieli infarmacyi pra miescaznachodžańnie źniavolenych, ich stan zdaroŭja i pryčyny aryštu. Ciapier 26 zatrymanym inkryminujecca padrychtoŭka i navučańnie asobaŭ dla ŭdziełu ŭ masavych biesparadkach, za što im pahražaje da troch hadoŭ turemnaha źniavoleńnia. Pierakananyja, što ŭzbudžanaja adnosna ich kryminalnaja sprava nosić vyklučna palityčny charaktar, źjaŭlajecca biazdokaznaj i maje adzinuju metu — zapałochać hramadstva i adciahnuć uvahu ad sacyjalna-ekanamičnych prablem u krainie.

MHA «Zhurtavańnie biełarusaŭ śvietu «Baćkaŭščyna»» i hramadskaje abjadnańnie «Sajuz biełaruskich piśmieńnikaŭ» vykazvajuć abureńnie chvalaj palityčnych represij u dačynieńni da pradstaŭnikoŭ biełaruskaj hramadzianskaj supolnaści.

Patrabujem ad biełaruskich uładaŭ spynić represii, nieadkładna vyzvalić usich źniavolenych i źniać niespraviadlivyja abvinavačańni, a taksama pryciahnuć da adkaznaści tych słužbovych asobaŭ, jakija parušajuć kanstytucyjnyja pravy hramadzian.

Zaklikajem biełaruskaje hramadstva ŭ krainie i za jaje miežami da prajaŭleńnia salidarnaści z zatrymanymi i ich siemjami.

Zaklikajem mižnarodnuju hramadzianskuju supolnaść i kirujučyja orhany demakratyčnych krain śvietu rašuča adreahavać na represii suprać hramadzianaŭ Biełarusi i zapatrabavać ad biełaruskaha kiraŭnictva zabieśpiačeńnia pravoŭ čałavieka i vykanańnia normaŭ zakonnaści.

Vykazvańnie hramadzianskaj pazicyi i patryjatyzm nie źjaŭlajucca złačynstvam.

• 0
• 0
• 0
• 0
• 0
• 0
• 0
• 0