ŚMI: Rasija vałodaje kampramatam na Trampa, videa jaho orhii ŭ Maskvie
U amierykanskija ŚMI trapiła daśje, padrychtavanaje, jak śćviardžajecca, byłym supracoŭnikam brytanskaj raźviedki. Zhodna ź im, Rasija nastojliva padtrymlivała kandydaturu Trampa, bo maje na jaho kampramat — videa, źniataje ŭ hateli «Ryc-Karłtan» u Maskvie.
U daśje śćviardžajecca, što śpiecapieracyja pa «hadavańni, padtrymcy i dapamozie» Trampu doŭžyłasia doŭhija hady.
Infarmacyju pra kantakty pamočnikaŭ Trampa z ahientami rasijskaj raźviedki, a taksama pra najaŭnaść u Rasii videazapisaŭ orhii Trampa ŭ maskoŭskim hateli niemahčyma pravieryć, adznačajuć ŚMI.
Pry hetym telekanał Si-En-En paviedamiŭ, što dvuchstaronkavaje reziume dakłada było pieradadziena prezidentam Abamu i Trampu.
Advakat Trampa Majkł Koen nazvaŭ śćviardžeńni z dakłada «absalutna łžyvymi».
«Heta tak śmiešna, — skazaŭ Koen. — Čałaviek uziaŭ heta sa svajho ŭjaŭleńnia i ŭ spadziavańni, što libieralnyja ŚMI schopiacca za hetuju fejkavuju historyju».
Sam Tramp adhuknuŭsia na publikacyju ŭ Tvitary, nazvaŭ jaje «tatalnym palityčnym palavańniem na viadźmarak»:
FAKE NEWS - A TOTAL POLITICAL WITCH HUNT!
U dakładzie śćviardžajecca, što Tramp nie pryniaŭ nastojlivyja prapanovy rasijskaha boku ab udziele ŭ vyhadnych deviełapierskich prajektach u Rasii. Ale, havorycca, Tramp vykarystaŭ pajezdku ŭ Maskvu dla zadavalnieńnia svaich seksualnych fantazij. Jon naniaŭ prastytutak, kab tyja, u pryvatnaści, vykanali pierad im tak zvany «załaty doždž» (mačylisia). Prytym usio heta rabiłasia ŭ tym samym numary, tym samym łožku, dzie spali ŭ časie svajho maskoŭskaha vizitu Barak i Mišel Abama. Miž tym usie pakoi «Ryc-Karłtana» abstalavanyja schavanymi videakamierami, i hety materyjał akazaŭsia ŭ rukach FSB, pišacca ŭ dakładzie.
Rasijskija ŚMI adkryta padtrymlivali Trampa, a nie Klintan. Anałahična dziejničali šmatlikija prarasijskija «sajty ŭpłyvu» ŭ krainach byłoha SSSR i Jeŭropie, a taksama prarasijskija boty ŭ sacyjalnych sietkach.
Temaj Trampa i Klintan zajmaŭsia asabista pamočnik Pucina Piaskoŭ.
Zadačaj minimum było maksimalna raskałoć amierykanskaje hramadstva i pasiejać niedavier da Klintan, pieramohu jakoj u Maskvie ličyli amal niepaźbiežnaj.
U amierykanskija ŚMI praź Vikiliks byli źlityja pierapiska Klintan i dakumienty Demakratyčnaj partyi. Metaju hetych źlivaŭ było dematyvavać pieradusim levaje kryło demakrataŭ, moładź i prychilnikaŭ Bierni Sandersa, kab jany nie pajšli na vybary abo schilić pratestavyja hałasy na bok Trampa.
Hetaja stratehija akazałasia bolš čym paśpiachovaj. Choć Klintan ahułam pa krainie nabrała na 2% bolš hałasoŭ, čym Tramp, jana prajhrała vybary ŭ čatyroch klučavych štatach litaralna na niekalki tysiač hałasoŭ.
Asabistaha kampramatu na Klintan, śćviardžajecca ŭ dakładzie, u rasijskich śpiecsłužb nie było.
Jak śćviardžajecca ŭ dakumiencie, u pieradvybarny hod kamunikacyja miž Trampam i vysokapastaŭlenymi rasijskimi čynoŭnikami išła spačatku praz byłoha pijar-mieniedžara Janukoviča, a paśla Trampa Poła Manaforta. Zatym da spravy dałučylisia taksama daradca Trampa pa pytańniach zamiežnaj palityki Karter Pejdž i asabisty advakat Trampa Majkł Koen. Apošni sustrakaŭsia ŭ Prazie z pradstaŭnikami rasijskich śpiecsłužb, što pracujuć pad prykryćciom «Rossotrudničiestva». Havorka padčas kantaktaŭ viałasia ab publikacyi najaŭnaj u Rasii infarmacyi ab e-mejłach Klintan i pierapiscy kiraŭnictva Dempartyi.
Vy možacie sami aznajomicca z tekstam dakłada tut nižej.
Ciapier čytajuć
Cichanoŭski ŭ Jelskim univiersitecie prapanavaŭ try elemienty stratehii ZŠA nakont Biełarusi24
Kamientary