Niejrabijołahi z Univiersiteta Kałhary znajšli rečyva, jakoje moža dapamahčy chvorym na raśsiejany skleroz spravicca z chvarobaj. Im akazaŭsia N-aceciłhlukozamin (fłuorozamin), jaki pakul jašče nie adobrany dla vykarystańnia ludźmi, adnak demanstruje efiektyŭnaść pry ekśpierymientach na myšach. Vyniki daśledavańnia apublikavanyja ŭ Nature Communications.
Raśsiejany skleroz — chraničnaje zachvorvańnie, vyklikanaje atakaj imunnaj sistemy na zdarovyja kletki samoha arhanizma. U vyniku adbyvajecca razbureńnie elektraizalujučych mijelinavych abałonak, jakija atačajuć niervovyja vałakny centralnaj niervovaj sistemy. U chvoraha ŭtvarajucca šmatlikija ačahi aŭtaimunnaha zapaleńnia, dzie narmalnaja niervovaja tkanka zamianiajecca na złučalnuju.
Mijelinavaja abałonka ŭtvarajecca z hlijalnych kletak, da jakich adnosiacca alihadendracyty. Peŭnyja rečyvy, naprykład, chandraicin sulfat protainhlikany, hrajuć rolu malekularnych sihnałaŭ, jakija rehulujuć rehienieracyju mielinu na ŭčastkach paškodžańnia niervovych vałoknaŭ. Jany spryjajuć padaŭleńniu raźvićcia i funkcyj alihadendracytaŭ.
Navukoŭcy vyprabavali 245 preparataŭ, kab znajści tyja złučeńni, što dazvalajuć alihadendracytam raści i pracavać u prysutnaści protainhlikanaŭ. Jany vyjavili, što N-aceciłhlukozamin u kletkach paddoślednych myšej pamianšaje sintez protainhlikanaŭ i adnaŭlaje funkcyi hlijalnych kletak. Daśledčyki prademanstravali, što ŭviadzieńnie preparatu spryjaje rehienieracyi mijelinavych abałonak i pamianšeńniu parezu kancavin u hryzunoŭ, jakija pakutujuć na raśsiejany skleroz.
U ekśpierymientach niejrabijołahi vykarystoŭvali dźvie hrupy žyvioł pa siem-vosiem asobin u kožnym. Navukoŭcy padkreślivajuć, što heta papiarednija daśledavańni, i nieabchodnyja dalejšyja kliničnyja vyprabavańni preparatu, kab paćvierdzić biaśpieku i efiektyŭnaść patencyjnaha mietadu lačeńnia, pierš čym praviarać jaho dziejańnie na ludziach.
Kamientary