Samakiravany futurystyčny hruzavik zmoža jeździć pa darohach ZŠA FOTA
Hruzaviku ŭsio roŭna patrebny kiroŭca — pieravažna kab siadzieć u kabinie i rassłablacca.
Kancern Daimler pradstaviŭ u Łas-Viehasie Freightliner Inspiration Truck — pieršy ŭ śviecie hruzavik z aŭtapiłotam, jaki možna vykarystoŭvać na darohach ZŠA, paviedamlaje The Verge.
Technałohija Highway Pilot uklučaje kruiz-kantrol, kamiery, radary i dalnamiery, što dazvalaje hruzaviku samastojna jechać pa vyznačanaj pałasie, raspaznavać znaki, utrymlivać biaśpiečnuju dystancyju i paźbiahać avaryj.
Pa stupieni aŭtanomnaści hruzavik anałahičny bieśpiłotnamu aŭtamabilu Google. Padčas raniejšych vyprabavańniaŭ jon paśpiachova prajechaŭ pa treku ŭ Hiermanii 16 tysiač kiłamietraŭ.
Kiroŭca patrebny tolki pry źmienie maršruta, parkoŭcy i razhruzcy. Akramia taho, hruzavik nie vałodaje manieŭrami abhonu dy moža razhubicca ŭ zatory. Dla karektnaj pracy aŭtapiłota patrebnaja jakasnaja raźmietka.
Tym nie mienš, jon zdolny razhruzić kiroŭcu ad stomy, uziaŭšy na siabie bolšuju pa časie častku pracy — jazdu pa pramoj darozie. Jak pakazali ŭłasnyja daśledavańni kampanii, aŭtapiłot na 25% źmianšaje sanlivaść kiroŭcy i ekanomić 5% paliva za košt razumnaha padtrymańnia chutkaści.
Pieršaj vypuskać na darohi «napaŭbieśpiłotny» hruzavik advažyłasia tolki Nievada, za joj paśledavali jašče 4 štaty. Dla paŭnavartasnaha vykarystańnia hruzavikoŭ pa ZŠA hetaha mała, ale pakul mała i samich hruzavikoŭ — Daimler vypuściła ŭsiaho dźvie mašyny z aŭtapiłotam.
Kamientary