Sprava suprać Pačobuta razvaliłasia

Upraŭleńnie Śledčaha kamiteta Biełarusi pa Hrodzienskaj vobłaści zaviaršyła rasśledavańnie kryminalnaj spravy ŭ dačynieńni da žurnalista polskaha vydańnia «Gazety Wyborczej» Andreja Pačobuta, abvinavačanaha ŭ paklopie na Łukašenku.

«Upraŭleńniem Śledčaha kamiteta Biełarusi pa Hrodzienskaj vobłaści zavieršana rasśledavańnie kryminalnaj spravy, uzbudžanaj pa č.2 st.367 KK Respubliki Biełaruś (paklop u dačynieńni da prezidenta Respubliki Biełaruś, ździejśnienaja asobaj, jakuju raniej sudzili za paklop) u dačynieńni da Pačobuta A.S." , — paviedamili ahienctvu «Interfaks-Zachad» u hrupie infarmacyi i suviazi z hramadskaściu ŭpraŭleńnia SK pa Hrodzienskaj vobłaści.

«U suviazi z tym, što vysnovy linhvistyčnych ekśpiertyz razychodziacca, a ŭ časie papiaredniaha śledstva nie zdabyta abjektyŭnych dadzienych, jakija paćviardžajuć ździajśnieńnie Pačobutam dadzienaha złačynstva, 15 sakavika 2013 vyniesiena pastanova ab spynieńni papiaredniaha rasśledavańnia ŭ suviazi ź niedakazanaściu ŭdziełu abvinavačanaha ŭ ździajśnieńni złačynstva. Zhodna z hetaj ža pastanovy abranaja ŭ dačynieńni da Pačobuta miera strymańnia ŭ vyhladzie padpiski ab niavyjeździe i naležnych pavodzinach admieniena «, — udakładnili ŭ SK.

«Ja daviedaŭsia pra heta siońnia, a 19.04, — raskazaŭ NN Andrej Pačobut. — Pra zakryćcio majoj spravy napisaŭ „Interfaks“, paśla ŭžo advakat zvaniŭ u Śledčy kamitet, dzie skazali, što mnie jašče vysłanaje aficyjnaje paviedamleńnie ab hetym, jakoje ja jašče atrymaju». Zakryćcio svajoj spravy žurnalist aceńvaje jak palityčnaje rašeńnie, pryniataje paśla taho, jak jaho nie ŭdałosia prymusić źjechać z krainy: «Mianie tady demanstratyŭna aryštavali, choć ja byŭ tolki padazravany, aznajomili z vynikami ekśpiertyzy, ź jakich adnaznačna vynikali i paklop, i źniavaha, i mnohaje inšaje. Kali b paśla vyzvaleńnia pad padpisku ja zachacieŭ rušyć kudy-niebudź u bok Maskvy, mnie b, dumaju, jašče dali eskort, kab nichto nie spyniŭ».

Ekśpiertu, na vysnovach jakoha hruntavałasia abvinavačańnie (a heta dziaržaŭny ideołah Kizima), apraŭdany Pačobut nie maje čaho skazać: «Heta maryjanietki, jany kažuć toje, što im zahadajuć».

Pačobut peŭny, što zakryćcio jaho spravy budzie padadzienaje biełaruskimi ŭładami jak «stanoŭčy žest u bok Zachadu».

* * *

Nahadajem, karespandenta aryštavali ŭ červieni 2012 hoda, ale paśla vypuścili pad padpisku ab niavyjeździe. Andreja Pačobuta abvinavacili ŭ paklopie na Łukašenku. Padstavami dla abvinavačvańnia stali artykuły Pačobuta na sajtach charter97.org i «Biełaruski partyzan». Jamu pahražała pazbaŭleńnie voli na termin da 5 hadoŭ. Pačobut byŭ pryznany viaźniem sumleńnia.

• 0
• 0
• 0
• 0
• 0
• 0
• 0
• 0