Z 2013 hoda ŭ Biełarusi płanujecca ŭvieści sistemu tax-free

Kab paśpieć da čempijanata śvietu pa chakiei.

Z 2013 hoda ŭ Biełarusi płanujecca ŭvieści sistemu tax-free. Pra heta paviedamiła namieśnik ministra pa padatkach i zborach Eła Sialickaja.

«Ministerstva pa padatkach i zborach prapanoŭvaje z 2013 hoda ŭvieści novy miechanizm viartańnia PDK dla zamiežnych fizasob, jakija buduć naviedvać našu krainu i vyvozić nabytyja ŭ krainie tavary za miažu. Heta tak zvanaja sistema tax-free», — skazała Sialickaja. Jana adznačyła, što hetaja sistema aktyŭna prymianiajecca ŭ jeŭrapiejskich i prybałtyjskich krainach. Takim miechanizmam taksama zacikavilisia i ŭ Rasii.

Sialickaja padkreśliła, što Biełaruś aktyŭna naviedvajuć zamiežnyja turysty, jakija pryjazdžajuć, u pryvatnaści, na azdaraŭleńnie, pavialičyłasia kolkaść mižnarodnych mierapryjemstvaŭ, što pravodziacca ŭ krainie. U pryvatnaści, u 2014 hodzie ŭ Biełarusi budzie praviedzieny čempijanat śvietu pa chakiei. «Tamu my adpracoŭvajem miechanizm, kab z 1 studzienia ŭ Biełarusi ŭvieści miechanizm viartańnia PDK dla zamiežnych hramadzian», — padkreśliła Sialickaja.

Sistema tax-free — heta mižnarodnaja prahrama kampanii Global Refund, jakaja dazvalaje atrymlivać hrašovaje kampiensavańnie PDK, što ŭvachodzić u košt kuplenaha za miažoj tavaru. Pasłuhami kampanii štodzionna karystajucca zvyš 22 tysiač čałaviek va ŭsim śviecie.

Kožny, chto viartajecca z-za miažy z pakupkami, zroblenymi ŭ mahazinach tax-free, maje prava na hrašovaje kampiensavańnie sumy padatkaŭ, vypłačanaj za nabytyja tavary. U siarednim, u zaležnaści ad padatkovaha zakanadaŭstva krainy znachodžańnia, suma, jakaja viartajecca, składaje ad 10 da 20% ad koštu tavaru. Hetyja hrošy možna atrymać pry prachodžańni mytnaha kantrolu, pakidajučy krainu znachodžańnia.

Kamientary da artykuła