Matč u padtrymku ŁHBT na futbolnym ČS-2026 prypaŭ na hulniu zbornych krain, dzie adnapołyja adnosiny zabaronienyja

Matč čempijanatu śvietu pa futbole 2026 hoda, pryznačany arhanizatarami jak Pride Match dla padtrymki ŁHBTK+ supolnaści, maje prajści pamiž dźviuma krainami, dzie homaseksualnaść zabaronienaja — Jehiptam i Iranam, paviedamlaje Bi-bi-si.

Zdymak ilustracyjny. Fota: Chris Pizzello / Invision / AP

Miascovy arhanizacyjny kamitet u Sietle, adnym z haradoŭ — haspadaroŭ turniru, paviedamiŭ, što hulnia na stadyjonie Lumen Field 26 červienia budzie pryśviečanaja śviatkavańniu ŁHBTK+ kultury. Płany na matč byli składzienyja jašče da taho, jak byli viadomyja ŭdzielniki i hrupy ČS-2026.

Pry hetym u Iranie za homaseksualnyja adnosiny pahražaje śmiarotnaje pakarańnie, a ŭ Jehipcie zakony ab maralnaści časta vykarystoŭvajucca dla abmiežavańnia pravoŭ ŁHBTK+ ludziej.

Mierapryjemstva arhanizavanaje tolki miascovym kamitetam i nie maje aficyjnaha statusu FIFA. Jano supadzie z aficyjnym Pride weekend u Sietle, i miascovyja mastaki ŭ hety dzień zmohuć vystavić svaje raboty dla dekaracyj vakoł stadyjona i horada.

Kamitet pa Pride Match padkreśliŭ, što hulnia adbudziecca pa płanie i što jaje meta — śviatkavańnie i padtrymka ŁHBTK+ padziej u Sietle i ZŠA, a taksama demanstracyja adzinstva i pavahi da ŭsich.

Heta nie pieršy raz, kali sproby padtrymki ŁHBTK+ na ČS sutykajucca z prablemami: na čempijanacie śvietu 2022 hoda ŭ Katary hulcy, jakija płanavali nasić paviazku OneLove, ryzykavali atrymać žoŭtuju kartku.

Kamientary da artykuła