Krainy ES płanujuć całkam admovicca ad rasijskaha hazu da vosieni 2027 hoda
Jeŭraparłamient i Rada ES papiarednie ŭzhadnili praviły paetapnaha admaŭleńnia ad impartu rasijskaha hazu, vynikaje z pres-relizu Jeŭraparłamienta. Płan atrymaŭ nazvu REPowerEU, paviedamlaje «Dožd́».
Dla karotkaterminovych kantraktaŭ zabarona na zvadkavany pryrodny haz nabudzie moc 25 krasavika 2026 hoda, na haz pa trubapravodach — 17 červienia 2026 hoda.
Dla doŭhaterminovych kantraktaŭ zabarona na ZPH pačnie dziejničać 1 studzienia 2027 hoda, a na haz pa trubapravodach — 30 vieraśnia 2027 hoda.
Taksama novy rehłamient abaviazvaje krainy ES pradstavić nacyjanalnyja płany pa admovie ad rasijskaha hazu z ukazańniem prablem, jakija mohuć uźniknuć praz heta.
Adnak «u vypadku rezkaj pahrozy enierhietyčnaj biaśpiecy adnoj abo niekalkich krain ES» zaklučyć kantrakt z Rasijaj usio ž možna.
Heta vialikaje dasiahnieńnie dla nas i dla ŭsioj Jeŭropy. Treba całkam spynić zaležnaść ES ad rasijskaha hazu, i jaho pastajannaja zabarona — važny krok u hetym kirunku. Ja rad, što nam udałosia tak chutka damovicca ź Jeŭraparłamientam, — zajaviŭ ministr enierhietyki Danii Łars Aahard.
Dakumient ustupić u siłu paśla zaćviardžeńnia Radaj ES i Jeŭraparłamientam.
Ab zabaronie na impart rasijskaha hazu pa trubapravodach i SPH stała viadoma z 19‑ha pakieta sankcyj ES. Pavodle danych Centra daśledavańniaŭ enierhii i čystaha pavietra, z pačatku poŭnamaštabnaj vajny va Ukrainie i da vieraśnia 2025 hoda ES zakupiŭ pałovu ŭsiaho ekspartu rasijskaha ZPH. Dalej iduć Kitaj i Japonija.