Bieły dom apublikavaŭ «Zału hańby» ŚMI
Zapusk na sajcie Biełaha doma staronki sa śpisam miedyjaresursaŭ, jakich trampaŭskaja administracyja vinavacić u fejkach, staŭ čarhovym krokam u eskałacyi praciahłaha supraćstajańnia prezidenta Donalda Trampa sa ŚMI.
Administracyja prezidenta ZŠA Donalda Trampa zapuściła na sajcie Biełaha doma novuju staronku, pryśviečanuju miedyjaresursam, jakich abvinavačvaje ŭ «raspaŭsiudžvańni fejkaŭ» i skažeńni słoŭ i padziej z udziełam prezidenta ZŠA.
Staronka maje žorstki zahałovak: «Uvodziać u zman. Praduziatyja. Vykrytyja» i składajecca ź niekalkich častak, jakija ranžyrujuć ŚMI pavodle «prastupkaŭ».
Asnoŭnyja raździeły staronki
«Miedyjaparušalnik tydnia». U hetym raździele pieraličanyja CBS News, The Boston Globe i The Independent.
«Zała hańby parušalnikaŭ». Heta «zbornik chłuślivych i ŭvodziačych u zman materyjałaŭ». Tut u formie tablicy pryvodziacca navinavyja nahody, aśviatleńnie jakich Bieły dom ličyć «fejkavym».
«Tablica lidaraŭ». Siudy ŭniesieny vydańni, jakija, na dumku administracyi, najbolš sistematyčna ŭvodziać u zman: The Washington Post, MSNBC, CBS News, CNN, The New York Times, Politico, The Wall Street Journal.
«Recydyvisty». Tut pieraličany vydańni, jakija sistematyčna źjaŭlajucca ŭ śpisach «parušalnikaŭ» administracyi. Siarod ich — Axios, BBC, Associated Press, The Hill i inšyja.
Stvareńnie takoha śpisu źjaŭlajecca biesprecedentnym krokam z boku administracyi ZŠA ŭ jaje pastajannym kanflikcie z hałoŭnymi amierykanskimi miedyja.