U rejtynhu samych nasielenych haradoŭ śvietu pamianiaŭsia lidar

Stalica Indaniezii Džakarta stała horadam z samym vialikim nasielnictvam u śviecie, zabraŭšy lidarstva ŭ Tokia. Pavodle spravazdačy Adździeła pa narodanasielnictvie Departamienta AAN pa ekanamičnych i sacyjalnych pytańniach, u Džakarcie ciapier žyvie kala 42 miljonaŭ čałaviek.

Na druhim miescy pa kolkaści žycharoŭ znachodzicca stalica Banhładeš — Daka, dzie žyvuć prykładna 36,5 miljonaŭ čałaviek. Raniejšy lidar, japonski Tokia, apuściŭsia na treciaje miesca z 33,4 miljona žycharoŭ; u papiarednim dakładzie AAN za 2018 hod jon zajmaŭ pieršaje miesca z 37 miljonami. 

Inšyja miescy ŭ top-10 zajmajuć hetyja harady: 

4. Ńju-Deli (Indyja) — 30,2 miljona čałaviek;

5. Šanchaj (Kitaj) — 29,5 miljonaŭ čałaviek;

6. Huančžou (Kitaj) — 27,5 miljonaŭ čałaviek;

7. Kair (Jehipiet) — 25,5 miljonaŭ čałaviek;

8. Maniła (Filipiny) — 24,7 miljona;

9. Kalkuta (Indyja) — 22,5 miljonaŭ čałaviek;

10. Sieuł (Paŭdniovaja Kareja) — 22,4 miljona čałaviek.

U spravazdačy adznačajecca, što ŭ 1950 hodzie kala 20% nasielnictva śvietu žyło ŭ haradach, a siońnia hety pakazčyk vyras da pryblizna 50%. Da 2050 hoda dźvie traciny hłabalnaha pryrostu nasielnictva prypaduć na harady, astatniaja tracina — na pasiołki haradskoha typu.

Kolkaść miehapolisaŭ z nasielnictvam bolš za 10 miljonaŭ čałaviek za paŭstahodździa pavialičyłasia ŭ čatyry razy — z 8 u 1975 hodzie da 33 u 2025 hodzie. Dzieviać ź dziesiaci ciapierašnich najbolš zasielenych haradoŭ — Džakarta, Daka, Tokia, Ńju-Deli, Šanchaj, Huančžou, Kair, Maniła, Kalkuta i Sieuł — znachodziacca ŭ Azii.

Jak adznačajecca ŭ dakładzie, urbanizacyja źjaŭlajecca klučavoj siłaj našaha času. Pry stratehičnym i kompleksnym kiravańni jana moža adkryć novyja mahčymaści dla baraćby z klimatyčnymi źmienami, dla ekanamičnaha rostu i sacyjalnaj spraviadlivaści.

Treba adznačyć, što ciapier u Indaniezii raspačaŭsia praces pieranosu stalicy z Džakarty ŭ novapabudavany horad Nusantara. Pra pieranos stalicy z Džakarty na vostravie Java było abvieščana ŭ 2019 hodzie. Asnoŭnaj pryčynaj nazyvałasia toje, što Džakarta pieranasielenaja i znachodzicca pad pahrozaj apuskańnia ŭ mora, a bolšaja častka horada ŭžo znachodzicca nižej za ŭzrovień mora. 

Kamientary da artykuła