Seks ź niepaŭnaletniaj: skandał u francuzskaj futbolnaj zbornaj
Miescam sustrečy było «Zeman-kafe» na Jelisiejskich palach.
Karym Bienzema.
Niekalki hulcoŭ francuzskaj zbornaj abvinavačvajucca ŭ seksie ź niepaŭnaletnimi prastytutkami. Dvoje ź ich užo dapytanyja. Skandał moža adbicca nie tolki na składzie zbornaj na Kubku śvietu ŭ Paŭdniovaj Afrycy, ale i na imidžy francuzskaha futboła.
Pra skandał paviedamili ŭ subotu telekanał M6 i hazieta L'Equipe. Infarmacyja datyčyła šerahu klučavych hulcoŭ kamandy. U niadzielu ŭ francuzskich ŚMI źjavilisia imiony Franka Rybiery («Bavaryja») i Sidneja Havu («Lijon»). Advakat Rybiery kaža, što jaho klijenta dapytvali tolki jak śviedku.
Abvinavačańni Havu asprečyŭ jaho ahient, jaki kaža, što futbalist nie pierastupaŭ parohu«Zeman-kafe» — baru, dzie adbyvalisia sustrečy z prastytutkami. Francuzskaja presa adrazu ŭspomniła, što futbalist — nie niavinnaje dzicia. Paŭtara hodu tamu Havu byŭ aryštavany za kiravańnie mašynaj u niećviarozym stanie. Noč jon pravioŭ u kamiery, a potym publična paprasiŭ prabačeńnia ŭ kłuba i zaŭziataraŭ.
U niadzielu źjaviłasia infarmacyja jašče pra dvuch futbalistaŭ. Heta Karym Bienzema («Reał») i Chatem Ben Arfa (marselski «Alimpik»).
Hetaja infarmacyja ŭspłyła padčas rasśledavańnia spravy pra suteniorstva ŭ papularnym siarod futbalistaŭ načnym kłubie ŭ rajonie Jelisiejskich paloŭ. Paryžskaja palicyja vyjaviła, što siarod klijentaŭ byli hulcy futbolnaj zbornaj Francyi. Darečy, vyśvietliłasia, što adna z žančyn, jakija pracujuć u kłubie, była niapoŭnahadovaj.
Za seks ź niapoŭnahadovymi ŭ Francyi pieraduhledžanaje pakarańnie tryma hadami turmy i štrafam u pamiery 45 tysiač jeŭra.
Sprava była pieradadzienaja ŭ prakuraturu. Nieŭzabavie pačniecca sudovy praces. Francuzskaja fiederacyja futbołu ad kamientaroŭ ustrymlivajecca.
Skandał aśviatlajecca i ŭ presie za miežami Francyi. Anhielskija i ispanskija haziety miarkujuć, što kali ŭsio apyniecca praŭdaj, heta budzie vialiki ŭdar pa imidžy francuzskaha futbołu i moža paŭpłyvać na skład kamandy ŭ Kubku śvietu 2010 hodu.