Navukoŭcy: Karanavirus moža zastavacca hłyboka ŭ lohkich tych, chto vyzdaravieŭ
Pacyjenty, jakija pierachvareli na COVID-19 i ŭžo vypisanyja z balnicy, mohuć pa-raniejšamu nieści hłyboka ŭ lohkich čaścinki karanavirusa. Takaja reštkavaja infiekcyja nie moža być vyjaŭlenaja padčas zvyčajnych testaŭ, śćviardžaje hrupa kitajskich navukoŭcaŭ.
Ich daśledavańnie, pra vyniki jakoha paviedamlaje ŭ čaćvier hazieta South China Morning Post, moža pralić śviatło na toje, čamu niekatoryja ačuniałyja pacyjenty paśla znoŭ pryznajucca infikavanymi, piša tass.ru.
«Naša praca — heta pieršaje śviedčańnie ŭ halinie patałohii ab reštkavym virusie ŭ lohkich pacyjenta, u jakoha testy try razy zapar akazvalisia admoŭnymi», — havorycca ŭ materyjale miedykaŭ, uznačalenych doktaram Biań Siu z armiejskaha miedycynskaha ŭniviersiteta horada Čuncyn.
Jany daśledavali vypadak 78-hadovaj pacyjentki, jakaja była špitalizavanaja z COVID-19 i prajšła kurs lačeńnia, pa vynikach jakoha testy (na asnovie analizu mazkoŭ z nasavoj i rotavaj połaści) byli try razy zapar admoŭnyja. Abśledavańnie mietadam kampjutarnaj tamahrafii taksama pakazała značnaje palapšeńnie stanu pacyjentki, adnak na nastupny dzień jana niečakana pamierła ad sardečnaha prystupu.
Uskryćcio i praviedzienaje daśledavańnie pad elektronnym mikraskopam vyjavili ślady čaścic karanavirusa ŭ hłybokich tkankach lohkich. Pry hetym prykmiety virusa adsutničali ŭ tkankach piečani, serca, kišečnika i ŭ kaścianym mozhu. Kitajskija miedyki, jakija apublikavali vyniki svajoj pracy ŭ navukovym časopisie Cell Research, kanstatavali, što schavanyja štamy ŭ lohkich u toj ža čas nie vyklikali nijakich vidavočnych simptomaŭ.