Tramp nie z pustymi rukami jedzie ŭ Varšavu na sustreču z kiraŭnikami krain Mižmorja
U čaćvier prezident ZŠA Donald Tramp sustreniecca ŭ Varšavie z kiraŭnikami krain Mižmorja — rehijona pamiž Bałtyjskim, Čornym i Adryjatyčnym marami. Tramp jedzie nie z pustymi rukami: jon viazie prapanovu kuplać amierykanski zvadkavany haz, kab źmienšyć zaležnaść ad rasijskich enierhanośbitaŭ.
Prezidenty ZŠA Donald Tramp (źleva) i Polščy Andžej Duda.
Takaja pierśpiektyva spakušaje ŭschodniejeŭrapiejskija krainy. Kali jość terminały zvadkavanaha pryrodnaha hazu (ZPH), Maskva bolš nie moža šantažavać krainy pahrozaj pierakryćcia truby zimoj, u aciaplalny siezon.
Litva zbudavała ŭłasny terminał dla ZPH pad Kłajpiedaj, a Polšča — u Śvinavuści. Charvatyja maje dabudavać ułasny ZPH-terminał da 2019 hoda.
Akramia taho, płanujecca pabudova ŭschodniejeŭrapiejskaha transpartnaha kalidora ad Kłajpiedy praz Koŭna, Polšču, Słavaččynu, Vienhryju, Rumyniju i Bałharyju da hrečaskaha porta Sałoniki. Hetaja miehainviestycyja pierpiendykularam źviaža isnujučyja aŭtamahistrali i darohi z Zachodniaj va Uschodniuju Jeŭropu.
Mižmorje, abo pa-anhielsku Three Seas Region, achoplivaje krainy ad Estonii da Charvatyi i Bałharyi. Časam u jaho ŭklučajuć i Biełaruś z Ukrainaj, naturalny jaho ŭschodni fłanh. Ale pakul ni Minsk, ni Kijeŭ nie ŭdzielničajuć u Three Seas Initiative, da jakoj naležać tolki 12 krain Jeŭrasajuza. Polšča — samaja mocnaja ekanomika i samaja nasielenaja kraina rehijona. Inšy paśladoŭny sajuźnik ZŠA ŭ Mižmorji — Rumynija. Trecim moža stać Ukraina.
Biełaruś zastajecca tatalna, na 95% zaležnaj ad rasijskaha hazu i nafty. Usie inšyja krainy rehijona ŭ bolšaj ci mienšaj stupieni ŭžo źnizili zaležnaść ad adnoj krynicy. Dyviersifikacyja adbyłasia zbolšaha za košt nafty. ZPH ž dazvalaje dyviersifikavać taksama pastaŭki hazu.
Z Varšavy Tramp pierajedzie ŭ Niamieččynu na samit G20 — najbolšych krain płaniety. Tam jaho čakajuć niaprostyja pieramovy z Anhiełaj Mierkiel, što abaraniaje intaresy Jeŭropy, i pieršaja sustreča z prezidentam Rasii Uładzimiram Pucinym.
Varta adznačyć, što rejtynh Trampa ŭ ZŠA zastajecca rekordny nizkim dla prezidenta. Mnohija schilnyja bačyć za dziejańniami Trampa pieradusim vyhadu dla źviazanych ź im amierykanskich karparacyj. Adnosiny Trampa ź jeŭrapiejskimi lidarami zastajucca naciahnutymi.