Makiej nakiravaŭsia ŭ Maskvu z rabočym vizitam
Ministr zamiežnych spraŭ Biełarusi Uładzimir Makiej 10 lipienia nakiravaŭsia ŭ Maskvu z rabočym vizitam, paviedamili BiełaPAN upres-słužbie biełaruskaha MZS.
Padčas vizitu Makiej praviadzie pieramovy sa svaim rasijskim kaleham Siarhiejem Łaŭrovym.
Na bryfinhu ŭ Maskvie 5 lipienia aficyjny pradstaŭnik MZS RF Alaksandr Łukaševič paviedamiŭ, što padčas pieramoŭ ministry płanujuć abmianiacca mierkavańniami «pa ŭsim kompleksie dvuchbakovych adnosin mižnarodnaha paradku dnia». «Zrazumieła, budzie razhladacca mahčymaść pavyšeńnia efiektyŭnaści ŭzajemadziejańnia supracoŭnictva našych krain u miežach Sajuznaj dziaržavy», — dadaŭ Łukaševič.
Makiej i Łaŭroŭ taksama majuć namier abmierkavać pytańnie funkcyjanavańnia Mytnaha sajuza.«Źvierym padychody pa dziejnaści ŭ mižnarodnych arhanizacyjach, u pryvatnaści ŭ AAN, ABSIE», — paviedamiŭ aficyjny pradstaŭnik MZS RF.
Chutčej za ŭsio, padčas sustrečy Uładzimir Makiej zakranie temu realizacyi biełaruskaj techniki ŭ Rasii.Napiaredadni vizitu ŭ Maskvu ŭ intervju telekanału STV jon paviedamiŭ, što pryznačany adkaznym za razhruzku składoŭ pradpryjemstva «Amkador».
«Za pradpryjemstvami, jakija majuć vialikuju zatavaranaść składoŭ, zamacavany adkaznyja słužbovyja asoby. MZS, u pryvatnaści ministr zamiežnych spraŭ, zamacavany za pradpryjemstvam „Amkador“. My ŭžo sustrakalisia z kiraŭnictvam hetaha pradpryjemstva. Vypracavali kankretny płan našaha ŭzajemadziejańnia, jaki, ja dumaju, dazvolić nam da kanca hoda spravicca z hetymi prablemami. Anałahična my płanujem dziejničać i pa inšych pradpryjemstvach», — skazaŭ Makiej.