Закрылася піцэрыя, якую італьянец адкрыў у вёсцы Крывая Бяроза

У Смалявіцкім раёне спыняе працу піцэрыя «Папача Піца», адкрытая ў 2025 годзе італьянскім рэстаратарам Паала Венэ. На сайце ўстановы цяпер з’явілася паведамленне, што яна «закрытая назаўсёды», піша Office Life.

Паала Венэ ў сваёй піцэрыі. Фота: Koko.by

Паала Венэ працуе ў рэстараннай сферы з 1988 года. Ягоная піцэрыя знаходзілася ў вёсцы Крывая Бяроза Смалявіцкага раёна. У меню былі піца, тырамісу і іншыя стравы італьянскай кухні.

Паводле інфармацыі ў сацыяльных сетках установы, цяпер уладальнік шукае інвестараў і партнёраў для адкрыцця новай піцэрыі. Калі знайсці падтрымку не ўдасца, ён плануе вярнуцца ў Італію.

На пытанні наведнікаў пра магчымасць заказаць піцу прадстаўнікі ўстановы адказваюць, што такая магчымасць ужо адсутнічае.

У пачатку чэрвеня Міністэрства антыманапольнага рэгулявання і гандлю прызнала неналежнай рэкламу «Папача Піца». Прэтэнзіі датычыліся сцвярджэнняў «Мы гатуем найлепшую піцу ў вашым горадзе» і «Найлепшы італьянскі шэф-повар піцы». Ведамства палічыла, што такія заявы ствараюць уражанне аб перавагах прадукцыі і яе вытворцы без дакументальнага пацвярджэння, і выдала прадпісанне спыніць распаўсюджванне гэтай рэкламы.

Каментары да артыкула