Жыхары Светлагорска — супраць будаўніцтва завода беленай цэлюлозы

Жыхары Светлагорска і вёскі Якімава Слабада выступаюць супраць будаўніцтва на базе Светлагорскага цэлюлозна-кардоннага камбіната завода беленай цэлюлозы.

23 студзеня пытанне магчымага будаўніцтва было абмеркаваны на сходзе ў Светлагорскім гарадскім цэнтры культуры. Прысутнічалі прадстаўнікі раённай улады, Светлагорскага ЦКК, Мінпрыроды, раённага цэнтра гігіены і эпідэміялогіі, Беларускага навукова-даследчага цэнтра «Экалогія».

«Было каля пяцісот чалавек. З залы не было ніводнай станоўчай рэплікі. Людзі ў большасці сваёй катэгарычна супраць будаўніцтва, бо гэта будзе шкодная вытворчасць, а ў нашым горадзе і без новага завода экалагічная сітуацыя вельмі дрэнная», — паведаміў член Сойма Партыі БНФ Вадзім Болбас, які раней працаваў у лабараторыі экалагічнага кантролю пры Светлагорскай інспекцыі прыродных рэсурсаў.

Перад сходам заяўлялася, што будзе заслухана Справаздача аб ацэнцы ўздзеяння на навакольнае асяроддзе планаванай гаспадарчай дзейнасці па будаўніцтве завода па вытворчасці сульфатнай беленай цэлюлозы на базе ААТ «Светлагорскі ЦКК». Але, паводле слоў Болбаса, было абнародавана толькі рэзюме не тэхнічнага характару — «пра тое, які ўплыў на экалогію акажа будаўніцтва завода, а не сама вытворчасць беленай цэлюлозы».

У рэзюме гаворыцца, што, «зыходзячы з прадстаўленых праектных рашэнняў, пры правільнай эксплуатацыі і абслугоўванні абсталявання, пры рэалізацыі прадугледжаных прыродаахоўных мерапрыемстваў, пры строгім вытворчым экалагічным кантролі негатыўнае ўздзеянне планаванай дзейнасці на навакольнае асяроддзе будзе нязначным».

Паводле слоў Болбаса,

галоўны інжынер цэлюлозна-кардоннага камбіната пераконваў людзей, што вытворчасць не будзе шкоднай і ён быў на падобным заводзе ў Кітаі.

На сходзе як хімік і эколаг ён расказаў аб праблемах, якія ўзнікаюць на заводах па вытворчасці цэлюлозы.

Грамадскі актывіст Тэльман Маслюкоў прапанаваў вынесці на галасаванне пытанне «Лічыць немэтазгодным будаўніцтва на базе ЦКК завода беленай цэлюлозы». «Але раённыя ўлады, якія праводзілі сход, усё адцягвалі гэта пытанне, вырашалі — галасаваць, не галасаваць, у выніку працягнулі час, і людзі разышліся», — сказаў Маслюкоў.

Паводле яго слоў, на сходзе было прапанавана стварыць грамадскую камісію, якая б адсочвала сітуацыю з будаўніцтвам завода. «Мы прапанавалі ўключыць у камісію трох прадстаўнікоў райвыканкама, цэнтра гігіены і эпідэміялогіі і ЦКК, а таксама сем прадстаўнікоў грамадскасці. Свае прапановы мы накіруем у выканкам і прапануем стварыць такую камісію», — паведаміў актывіст.

Завод па вытворчасці сульфатнай беленай цэлюлозы магутнасцю 400 тысяч тон у год плануецца пабудаваць на базе Светлагорскага цэлюлозна-кардоннага камбіната. Мяркуецца, што праектаваць і будаваць завод будуць кітайскія спецыялісты за кітайскі крэдыт у 654,16 млн. долараў.

• 0
• 0
• 0
• 0
• 0
• 0
• 0
• 0