Вядомая фітнэс-блогерка зрабіла вяселле ў беларускіх паганскіх традыцыях ФОТЫ
Вяселле адбылося на прыродзе, музыкі гралі старажытную беларускую музыку, а галаву нявесты ўпрыгожваў вянок.
Надзея Дамкоўская пачынала ў Беларусі як спявачка — некалькі гадоў яна выступала ў складзе гурта Cherry Lady (прадзюсіраваў яго Павел Клышэўскі, удзельнік гурта «Цягні-Штурхай»). Потым яна стварыла сваё канцэртнае агенцтва.
Апошнія гады Надзея вядомая як фітнэс-блогерка. Сёлета яна разам з доктарам Андрэем Белавешкіным вядзе перадачу «Без рэцэпту» на «Белсаце». Таксама Надзея стваральніца стартапа ў сферы ментальнага здароўя.
Яе абраннікам стаў Андрэй Гунько — ён нарадзіўся ў Баранавічах, адвучыўся ў БНТУ па спецыяльнасці інжынер-праграміст, але ў 2010 годзе эміграваў у ЗША. Ён уладальнік фірмы ў ЗША, якая займаецца вокнамі і дзвярыма.
Як і Надзея, Андрэй любіць спорт — ён удзельнічае ў спаборніцтвах па грэплінгу (від адзінаборстваў). Выступае мужчына з бел-чырвона-белым сцягам на кімано.
Вяселле адбылося яшчэ ў канцы верасня, але прыгожым відэа пара падзялілася нядаўна. Яны вырашылі зрабіць свята згодна з беларускімі паганскімі традыцыямі.
Адбылася цырымонія ў Польшчы, побач з палацам Разалін (у гістарычна-паркавым комплексе XIX стагоддзя, што за 35 кіламетраў ад Варшавы).
Беларускае традыцыйнае вяселле мае выразныя абрадавыя этапы, якія сімвалізуюць пераход маладых да новага сямейнага жыцця.
Спачатку жаніх развітваецца з родам і домам, адкуль паходзіць. Гэты момант пазначае яго гатоўнасць перайсці да новага стану — статусу гаспадара. Лічыцца, чым гучней ідзе жаніх, тым больш шчаслівым будзе шлюб. Таму працэсію суправаджалі музыкі.
Пасля быў абрад пасвячэння жаніха ў гаспадары. Госці-мужчыны насыпалі яму зерне і зычылі дабрабыту. Нявеста выходзіла адна, але ішла не да каханага — перад сустрэчай з будучым мужам дзяўчыну бласлаўлялі жанчыны.
Жаніх павінен сімвалічна пасеяць зерне перад тым, як да яго запросяць нявесту. Пасля маці кладзе на галаву нявесты вянок, бацькі бласлаўляюць вясельную стужку і перавязваюць ёй рукі маладых. А потым шчаслівую пару могуць віншаваць госці.
28‑гадовай беларусцы пасля жудаснай аварыі ў Тайландзе не могуць аказаць дапамогу — няма патрэбнай крыві1
Каментары