Настаўніца ў Паўднёвай Карэі забіла васьмігадовую вучаніцу. Гэта трагедыя шакавала ўсю краіну
48‑гадовая Мён Чжэ-ван забіла Кім Хё-ніль пасля таго, як заманіла яе ў клас. Гэта адбылося ў горадзе Тэджон у лютым.
Cуд у Паўднёвай Карэі прысудзіў настаўніцу да пажыццёвага зняволення за тое, што яна нажом забіла вучаніцу. Гэта справа шакавала ўсю краіну, піша Бі-бі-сі.
48‑гадовая Мён Чжэ-ван забіла Кім Хё-ніль пасля таго, як заманіла яе ў клас. Гэта адбылося ў горадзе Тэджон у лютым. Пракуроры патрабавалі для Мён смяротнага пакарання, заяўляючы, што сям’я ахвяры прасіла пра суровае пакаранне.
Аднак суд пастанавіў, што хаця «рызыка паўторнага злачынства высокая, цяжка зрабіць выснову», што Мён павінна быць пакарана смерцю.
Мён заявіла, што будзе каяцца ў сваіх памылках да канца жыцця. Яна сказала, што на момант нападу яе разважлівасць была аслабленая, бо яна праходзіла лячэнне псіхічнага здароўя.
Пракуроры сцвярджалі, што падчас расследавання справы Мён не праяўляла пакаяння. Аднак Мён падала ў суд дзясяткі лістоў, у якіх выказвала раскаянне.
Раней Мён прасіла шасцімесячны адпачынак з-за дэпрэсіі, але вярнулася ў школу ўжо праз 20 дзён пасля таго, як доктар прызнаў яе здольнай да працы, паведаміла ўпраўленне адукацыі Тэджона ў лютым.
Паводле гэтага ўпраўлення, у дні перад нападам яна праяўляла агрэсіўныя паводзіны, у прыватнасці схапіла іншую настаўніцу за шыю.
Раніцай у дзень нападу двое чыноўнікаў з адукацыйнага ведамства наведалі школу, каб расследаваць гэты папярэдні інцыдэнт.
Мён распавяла паліцыі, што ў дзень нападу набыла нож і прынесла ў школу, плануючы забіць сябе разам з выпадковым дзіцём.
Яна таксама распавяла следчым, што заманіла Кім у медыяклас, дзе напала на яе.
Вучаніцу Кім абвясцілі зніклай пасля таго, як кіроўца школьнага аўтобуса паведаміў адміністрацыі, што яна ў той дзень не прыйшла на месца пасадкі. Пазней у той жа дзень дзяўчынку знайшлі ў школе з нажавымі раненнямі побач з Мён.
У самой Мён таксама была рана на шыі, якую, паводле паліцыі, яна магла нанесці сабе сама. Рану пазней зашылі ў бальніцы.
Лідары Паўднёвай Карэі тады заклікалі прыняць меры бяспекі, каб прадухіліць падобныя інцыдэнты ў будучыні.
«Як настаўніца пачатковай школы, абвінавачаная знаходзілася ў становішчы, у якім павінна была абараняць ахвяру, — адзначана ў прысудзе суда, агучаным у панядзелак. — Але яна здзейсніла гэта жорсткае злачынства, у выніку якога дзіця не было абаронена там, дзе павінна была быць у найбольшай бяспецы».
Каментары