Міністр замежных спраў Арменіі Арарат Мірзаян паведаміў у інтэрв'ю Deutsche Welle, што краіна можа падаць заяўку на ўступленне ў Еўрапейскі саюз ужо ў лістападзе. Паводле яго слоў, гэта частка афіцыйнага курсу Ерэвана на еўраінтэграцыю.
«Можа быць, у наступным месяцы, а можа быць, у наступным годзе… Але, як я ўжо сказаў, гэта наша афіцыйная палітыка», — адзначыў Арарат Мірзаян, падкрэсліўшы стратэгічны курс Ерэвана на еўраінтэграцыю.
Армянскі міністр таксама адзначыў, што працэс увядзення бязвізавага рэжыму з ЕС можа заняць ад аднаго да двух гадоў. Перамовы пра гэта пачаліся яшчэ ў верасні 2024 года пасля рашэння Бруселя пашырыць супрацоўніцтва з Арменіяй.
Еўрасаюз гатовы адмяніць візы для кароткатэрміновых паездак пры ўмове, што Арменія правядзе рэформы ў сферы міграцыі, аховы межаў і барацьбы з карупцыяй.
У красавіку 2025 года прэзідэнт Арменіі Ваагн Хачатурян падпісаў закон аб намерах краіны далучыцца да ЕС, а ў жніўні прэм’ер Нікол Пашынян не выключыў магчымасці выхаду з Еўразійскага эканамічнага саюза (ЕАЭС)у сувязі з новым курсам на Еўропу.
У Маскве раней заяўлялі, што членства ў ЕС і ЕАЭС несумяшчальнае, хоць нібыта там і прызнаюць права Арменіі самастойна вызначаць свой шлях.
Тым часам кіраўніца еўрапейскай дыпламатыі Кая Каллас у чэрвені адзначыла, што ЕС гатовы паглыбляць партнёрства з Арменіяй ва ўсіх сферах — у тым ліку ў галіне абароны і бяспекі.
Цяпер чытаюць
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый67
Каментары